ସରିଛି ପଞ୍ଚାୟତ ନିର୍ବାଚନ | ଘୋଷଣା ହୋଇସାରିଛି ଫଳାଫଳ | ହେଲେ କମୁନି ନିର୍ବାଚନୀ ହିଂସା | ନିର୍ବାଚନରେ ହାରିଥିବା ଜଣେ ପ୍ରାର୍ଥୀ ଏବେ ଚୋବାଉଛନ୍ତି ରକ୍ତ ଚାଉଳ | କାହିଁକି ତାଙ୍କୁ ଭୋଟ ଦେଲନି ବୋଲି ଗୋଟେ ପରିବାର ଉପରେ କରିଛନ୍ତି ଆକ୍ରମଣ | ପରିବାର ଲୋକଙ୍କୁ ମରଣାନ୍ତକ ଆକ୍ରମଣ କରିବାରୁ ୪ଜଣ ହୋଇଛନ୍ତି ଆହତ | ଏଭଳି ହିଂସାକାଣ୍ଡ ଦେଖିବାକୁ ମିଳିଛି ଜଗତସିଂହପୁର ଜିଲା ସଦର ଥାନା ଶାଳଜଙ୍ଗ ପଞ୍ଚାୟତରେ |
ପଞ୍ଚାୟତର ଜଣେ ପ୍ରାର୍ଥୀ ଭୋଟରେ ହାରି ଯାଇଥିଲେ | ତେବେ ତାଙ୍କୁ କାହିଁକି ଭୋଟ ଦେଲେନି ବୋଲି ପରାଜିତ ପ୍ରାର୍ଥୀ ଜଣକ ବରଡି ଗାଁର ଜଣେ ବ୍ୟକ୍ତିଙ୍କ ଘରେ ପଶି ତାଙ୍କୁ ଓ ତାଙ୍କର ପରିବାର ଲୋକଙ୍କୁ ମରଣାନ୍ତକ ଆକ୍ରମଣ କରିଥିଲେ | ତେବେ ଏହି ଆକ୍ରମଣର ଦୃଶ୍ୟ ସିସିଟିଭିରେ କଏଦ ହୋଇଛି । ବରଡି ଗାଁର ସାଗର ସ୍ୱାଇଁ ଅନ୍ୟ ଜଣେ ପ୍ରାର୍ଥୀଙ୍କୁ ସମର୍ଥନ କରିଥିବାରୁ ପରାଜିତ ପ୍ରାର୍ଥୀ ଓ ତାଙ୍କର ସମର୍ଥକମାନେ ସାଗରଙ୍କ ଘରେ ପଶି ତାଙ୍କୁ ଆକ୍ରମଣ କରିଥିବା ସେ ଜଗତସିଂହପୁର ଥାନାରେ ଅଭିଯୋଗ କରିଛନ୍ତି । ଏହି ଆକ୍ରମଣରେ ୪ ଜଣ ଆହତ ହୋଇଥିବା ବେଳେ ସେମାନଙ୍କୁ ଜଗତସିଂହପୁର ଜିଲା ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି ।
