ସରିଛି ପଞ୍ଚାୟତ ନିର୍ବାଚନ | ଘୋଷଣା ହୋଇସାରିଛି ଫଳାଫଳ | କିନ୍ତୁ କମିନି ନିର୍ଵାଚନୀ ହିଂସା | ବିଜେଡିକୁ ଭୋଟ ଦେଇଥିବାରୁ ବିରୋଧୀ କରିଛନ୍ତି ଆକ୍ରମଣ | ବିରୋଧୀ ବିଜେପି କର୍ମୀଙ୍କ ଆକ୍ରମଣରେ ଆହତ ହୋଇଛନ୍ତି ଦମ୍ପତି | ଏଭଳି ହିଂସାକାଣ୍ଡ ଦେଖିବାକୁ ମିଳିଛି ଢେଙ୍କାନାଳ ଜିଲା କଙ୍କଡାହାଡ଼ ବ୍ଲକ ମହାବିରୋଡ଼ ଫାଣ୍ଡି ଅଞ୍ଚଳରେ |
କଙ୍କଡାହାଡ଼ ବ୍ଲକ ଦଶିପୁର ପଞ୍ଚାୟତ ଗୁରୁଜାଙ୍ଗୁଲି ଗାଁରେ ଘଟିଛି ଏଭଳି ହିଂସାକାଣ୍ଡ | ବିଜେଡିକୁ କାହିଁକି ଭୋଟ ଦେଲା ବୋଲି ବିଜେପି କର୍ମୀ ତାଙ୍କ ପରିବାର ଉପରେ ଆକ୍ରମଣ କରିଥିବା ଗୁରୁଜାଙ୍ଗୁଲି ଗାଁର ରୁନୁଵାଳା ବେହେରା ଆଜି ମହାବିରୋଡ଼ ଫାଣ୍ଡିରେ ଆସି ଅଭିଯୋଗ କରିଛନ୍ତି | ଗତକାଲି ସନ୍ଧ୍ୟା ସମୟରେ ସେ ତାଙ୍କ ସ୍ୱାମୀ ସୁଜନ ବେହେରା ଓ ପିଲାମାନେ ଘରେ ଥିବା ବେଳେ ଗାଁର ସୁଶୀଳ ସାହୁ ଓ ଚତୁରା ଦେହୁରୀ ଆସି ଘରର ଗ୍ରୀଲ ଭାଙ୍ଗି ଭିତରକୁ ଆସିଥିଲେ | ଆମ କଥା ନମାନି କାହିଁକି ଅନ୍ୟ ଦଳକୁ ଭୋଟ ଦେଲ କହି ରୁନୁଵାଳାଙ୍କୁ ଅସଭ୍ୟ ଭାଷାରେ ଗାଳି ଗୁଲଜ କଲେ | ଏପରିକି ବମ୍ବେରେ ତାଙ୍କୁ ବିକ୍ରି କରିଦେବାକୁ କହି ଧମକ ମଧ୍ୟ ଦେଲେ | ଏହାକୁ ସ୍ୱାମୀ ସୁଜନ ବିରୋଧ କରିବାରୁ ରୁନୁଵାଲା ଓ ତାଙ୍କ ସ୍ୱାମୀଙ୍କୁ ଅତର୍କିତ ଭାବରେ ଆକ୍ରମଣ କରିଥିଲେ ଉଭୟ । ଗାଁରେ ସେମାନେ ଆତଙ୍କ ଖେଳାଇ ରଖିଛନ୍ତି | ଏବେ କିପରି ଗାଁରେ ରହିବେ ସେହି ଚିନ୍ତାରେ ଅଛନ୍ତି ପରିବାର ଲୋକେ ।ଏହାର ବିଚାର କରିବା ପାଇଁ ମହାବିରୋଡ଼ ଫାଣ୍ଡିରେ ଲିଖିତ ଅଭିଯୋଗ କରିଛନ୍ତି ରୁନୁଵାଳା ।
