ସରକାରୀ ଯୋଜନାରୁ ଅପହଞ୍ଚ ଗାଁ

ଗରିବ ଲୋକଙ୍କ ପାଇଁ ସରକାର ମାଳ ମାଳ ଯୋଜନା କାର୍ଯ୍ୟକାରୀ କରିଛନ୍ତି | ଜନ୍ମରୁ ମୃତ୍ୟୁ ପର୍ଯ୍ୟନ୍ତ ଖଞ୍ଜି ଦେଇଛନ୍ତି ଯୋଜନା | ପ୍ରତ୍ୟେକ ଗରିବ ପରିବାରକୁ ଘର, ମାଗଣା ବିଜୁଳି ସଂଯୋଗ, ପାଣି ଓ ମାଗଣାରେ ଘରୋଇ ଡାକ୍ତରଖାନାରେ ଚିକିତ୍ସା ପାଇଁ ଯୋଜନା କରାଯାଇଛି। ହେଲେ ଆଜି ବି ଏମିତି ପରିବାର ଅଛନ୍ତି ଯେଉଁମାନଙ୍କ ପାଇଁ ସରକାରୀ ଯୋଜନା ପାଲଟିଛି ସ୍ବପ୍ନ | ଆଜି ପର୍ଯ୍ୟନ୍ତ ଘରକୁ ହୋଇନାହିଁ ବିଜୁଳି ସଂଯୋଗ । ଘର ତ କହିଲେ ଭୁଲ ହେବ, ପଲିଥିନ ଟାଣି ରୋଗୀଣା ଝିଅକୁ ଧରି ରହୁଛନ୍ତି ଦମ୍ପତି । ଅନ୍ଧାରରେ ବିତାଉଛନ୍ତି ରାତି | ଢେଙ୍କାନାଳ ଜିଲ୍ଲା କାମାକ୍ଷାନଗର ବ୍ଲକ କନ୍ତିଓପୁଟସାହି ପଞ୍ଚାୟତରେ ଏଭଳି ଦୃଶ୍ୟ ଦେଖିବାକୁ ମିଳିଛି |

କାମାକ୍ଷାନଗର ବ୍ଲକ କନ୍ତିଓପୁଟସାହିରେ ରୁହନ୍ତି ପ୍ରଦୀପ ଦେହୁରୀଙ୍କ ପରିବାର | ପରିବାର କହିଲେ ତାଙ୍କ ପତ୍ନୀ ରଶ୍ମିତା ଦେହୁରୀ ଓ ଛୋଟ ରୋଗୀଣା ଝିଅ | ପ୍ରଦୀପ ଜଣେ ଦିନ ମଜୁରୀଆ। ଗୋଟିଏ ବୋଲି ଝିଅ ରକ୍ତଶିକୁଳି (ସିକ୍ଲଙ୍ଗ) ରୋଗରେ ପୀଡିତା। ଝିଅକୁ ରକ୍ତ ଦରକାର ବୋଲି କହୁଛନ୍ତି ଡାକ୍ତର । ଝାଟିମାଟି ଘରେ ରହୁଥିବା ବେଳେ ବାତ୍ୟାରେ ଉଡ଼ି ଯାଇଛି ଛପର | ଫଳରେ ପଲିଥିନ ଟାଣି ଅତି କଷ୍ଟରେ ରହୁଛନ୍ତି | ଦିନ ମଜୁରୀଆ ଭାବରେ ଯାହା ରୋଜଗାର କରନ୍ତି ତିନି ପ୍ରାଣୀ କୁଟୁମ୍ବ ଚାଲିବ କଷ୍ଟକର | ଝିଅକୁ ଚିକିତ୍ସା କରିବା ଚିନ୍ତା ଦୁଃଖକୁ ଦୁଇ ଗୁଣା ବଢାଇ ଦେଇଛି । ଘରକୁ ଇନ୍ଦିରା ଆବାସ ପାଇଁ ବହୁ ଥର ଆବେଦନ କଲେ ମଧ୍ୟ କିଛି ମିଳୁନି ସୁଫଳ | ଏପରିକି ଅନେକ ଥର ସରପଞ୍ଚଙ୍କଠାରୁ ଆରମ୍ଭ କରି ବିଧାୟକଙ୍କୁ ଗୁହାରି କରିଛନ୍ତି ,ହେଲେ ତାଙ୍କ ଦୁଃଖ କେହି ଶୁଣୁ ନାହାଁନ୍ତି ବୋଲି କହିଛନ୍ତି ରଶ୍ମିତା ଦେହୁରୀ।