ପ୍ରସିଦ୍ଧ କୁସ୍ତିଯୋଦ୍ଧା ଗ୍ରେଟ୍ ଖଲି ତାଙ୍କର ରାଜନୈତିକ ଯାତ୍ରା ଆରମ୍ଭ କରିଛନ୍ତି | ଆଜି ବିଜେପି ଦଳରେ ଯୋଗ ଦେଇଛନ୍ତି ଖଲି । ସେ ଦିଲ୍ଲୀ ସ୍ଥିତ ବିଜେପି କାର୍ଯ୍ୟାଳୟରେ ବିଜେପି ନେତାଙ୍କ ଉପସ୍ଥିତିରେ ଦଳରେ ସାମିଲ ହୋଇଛନ୍ତି | ବିଜେପିରେ ଯୋଗ ଦେବା ପରେ ପ୍ରଧାନମନ୍ତ୍ରୀ ମୋଦୀଙ୍କୁ ପ୍ରଶଂସା କରିଛନ୍ତି କୁସ୍ତିଯୋଦ୍ଧା ଖଲି। ବିଜେପିରେ ଯୋଗ ଦେଇ ସେ ନିଜକୁ ଗୌରବାନ୍ୱିତ ମନେ କରୁଛନ୍ତି ବୋଲି କହିଛନ୍ତି ଖଲି । ସେ କହିଛନ୍ତି ଏମିତି କୌଣସି ଦେଶ ନାହିଁ ଯେଉଁଠାରେ ମୁଁ କୁସ୍ତିଯୁଦ୍ଧ ଖେଳି ନାହିଁ। ଯଦି ଟଙ୍କା ରୋଜଗାର କରିବାର ଥାନ୍ତା, ତେବେ ମୁଁ ଆମେରିକାରେ ରହିଥା’ନ୍ତି | ମୋର ଦେଶ ପ୍ରତି ଭଲପାଇବା ଯୋଗୁ ମୁଁ ଭାରତକୁ ଫେରିଛି। ପ୍ରଧାନମନ୍ତ୍ରୀ ହିସାବରେ ମୋଦି ଦେଶ ପାଇଁ ବେଶ ଉପଯୁକ୍ତ | ତେଣୁ ମୁ ଭାବିଲି ଦେଶରେ ରହି କାହିଁକି ଦେଶକୁ ଆଗକୁ ନେବାରେ ସହଯୋଗ କରିବି ନାହିଁ | ପୂର୍ବତନ WWE ଚାମ୍ପିଅନ୍ ଖଲିଙ୍କ ପ୍ରକୃତ ନାମ ହେଉଛି ଦିଲିପ ସିଂ ରାଣା | ଖଲି ହିମାଚଳ ପ୍ରଦେଶର ମୂଳ ବାସିନ୍ଦା | ସେ ପଞ୍ଜାବ ପୋଲିସରେ ମଧ୍ୟ ଚାକିରୀ କରିଥିଲେ | କିନ୍ତୁ ସେ ଜଳନ୍ଦରରେ କଣ୍ଟିନେଣ୍ଟାଲ ରେସଲିଂ ଏକାଡେମୀ (CWE) ଚଳାଉଛନ୍ତି | ଖଲି ବିଜେପିରେ ଯୋଗ ଦେବା ପରେ ପଞ୍ଜାବରେ ପାର୍ଟି ଉପକୃତ ହୋଇପାରିବ ବୋଲି କୁହାଯାଉଛି |
