ଅନ୍ଧାର ରାତିରେ ମାଡ଼ି ଆସିଲା ଟ୍ରେନ | କ୍ଷଣକ ଭିତରେ ଚାଲିଗଲା ୫ ଜୀବନ | ଟ୍ରେନ ଲାଇନରେ ଛିଡା ହୋଇଥିବା ବେଳେ ବିପରୀତ ଦିଗରୁ ଦ୍ରୁତ ବେଗରେ ଆସୁଥିବା ଏକ ଟ୍ରେନ ମାଡି ଯିବାରୁ ୫ ଯାତ୍ରୀଙ୍କ ମୃତ୍ୟୁ ଘଟିଛି| ଅନେକ ଯାତ୍ରୀ ଆହତ ହୋଇଥିବା ଜଣାପଡିଛି | ଆନ୍ଧ୍ରପ୍ରଦେଶର ଶ୍ରୀକାକୁଲାମରେ ସୋମବାର ରାତିରେ ଘଟିଛି ଏହି ଭୟାବହ ଦୁର୍ଘଟଣା | ଭୁବନେଶ୍ୱରରୁ ମୁମ୍ବାଇ ଯାଉଥିବା କୋଣାର୍କ ଏକ୍ସପ୍ରେସ୍ ଲୋକଙ୍କ ଉପରେ ମାଡି ଯାଇଥିଲା । ମୃତକଙ୍କ ମଧ୍ୟରୁ ୩ ଜଣଙ୍କୁ ଚିହ୍ନଟ କରାଯାଇଛି। ଏହି ଦୁର୍ଘଟଣାରେ ଜଣେ ଓଡ଼ିଆଙ୍କ ମୃତ୍ୟୁ ହୋଇଥିବା ସୂଚନା ରହିଛି । ମୃତକ ହେଲେ ଗଞ୍ଜାମ ଜିଲ୍ଲା ଭଞ୍ଜନଗର ଅଞ୍ଚଳର ଜିତୁ ନାୟକ । ତାଙ୍କୁ ଗୁରୁତର ଅବସ୍ଥାରେ ବିଜୟନଗରମ୍ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କ ମୃତ୍ୟୁ ହୋଇଛି ।
ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, କୋଏମ୍ବାଟୁର-ସିଲଚର ଏକ୍ସପ୍ରେସ ଟ୍ରେନ୍ ଗୌହାଟି ଅଭିମୁଖେ ଯାତ୍ରା କରୁଥିଲା। ସିଗାଡ଼ାମ-ଚିପୁରୁପଲ୍ଲୀ ଷ୍ଟେସନ ମଝିରେ ଇଞ୍ଜିନରୁ ଧୂଆଁ ବାହାରିବାରୁ ଟ୍ରେନଟି ସେଠାରେ ଅଟକି ଥିଲା। ଏହି ସମୟରେ କିଛି ଯାତ୍ରୀ ଟ୍ରେନ୍ରୁ ଓହ୍ଲାଇ ଟ୍ରାକ୍ରେ ବୁଲୁଥିଲେ। ଏହି ସମୟରେ ବିପରୀତ ଦିଗରୁ କୋଣାର୍କ ଏକ୍ସପ୍ରେସ ଆସି ସେମାନଙ୍କୁ ମାଡି ଚାଲି ଯାଇଥିଲା |
