ପଡ଼ୋଶୀ ଛତିଶଗଡର ଦନ୍ତେୱାଡା ଜିଲ୍ଲାରେ ମଙ୍ଗଳବାର ସକାଳେ ପୋଲିସ ଓ ନକ୍ସଲଙ୍କ ମଧ୍ୟରେ ଘଟିଛି ବଡ଼ ଧରଣର ଗୁଳି ବିନିମୟ । ଏଥିରେ ୨ ବର୍ଦିଧାରୀ ମହିଳା ନକ୍ସଲ ନିହତ ହୋଇଛନ୍ତି । ପୋଲିସ ଘଟଣାସ୍ଥଳରୁ ୨ଟି ୧୨ ବୋର୍ ରାଇଫଲ, ଗୋଟିଏ ଦେଶୀ ବନ୍ଧୁକ, ବିସ୍ଫୋରକ ସାମଗ୍ରୀ ଏବଂ ବିପୁଳ ମାଓ ସାମଗ୍ରୀ ଜବତ କରିଛି ।
ଦନ୍ତେୱାଡାର କଟେକଲ୍ୟାଣ ଥାନା ଅଂଚଳର ଗୋରଲି-ମୁଥେଲି ଏବଂ ଦାନିକୋର୍ଥା ଜଙ୍ଗଲରେ ଏଲ୍ଓଏସ୍ ତଥା କଟେକଲ୍ୟାଣ ଏରିଆ କମିଟିର ବରିଷ୍ଠ କ୍ୟାଡରଙ୍କ ଉପସ୍ଥିତି ସମ୍ପର୍କରେ ପୋଲିସକୁ ମିଳିଥିଲା ଗୁଇନ୍ଦା ସୂଚନା | ପରେ ଡିଆଇଜି, ସିଆରପିଏଫ୍ ଏବଂ ଜିଲ୍ଲା ପୋଲିସ ମିଳିତ ଭାବେ ଉକ୍ତ ଜଙ୍ଗଲରେ ଚଳାଇଥିଲେ ସର୍ଚ୍ଚ ଅପରେସନ । ପୂର୍ବାହ୍ନ ୧୧ଟାରେ ଉଭୟ ପକ୍ଷ ମୁହାଁମୁହିଁ ହୋଇଥିଲେ । ମିଳିତ ବାହିନୀର ଗୁଳିରେ ୨ ମହିଳା ନକ୍ସଲ ପ୍ରାଣ ହରାଇଥିଲେ। ମୃତ ନକ୍ସଲମାନେ ହେଲେ ଏଲଓଏସ କମାଣ୍ଡର ମୁଞ୍ଜୁଲା ପୁନେମ ଏବଂ ମୁଚାକି ଗାଙ୍ଗି।ପୋଲିସ ପକ୍ଷରୁ ଜଙ୍ଗଲରେ ତଲାସି ଅଭିଯାନ ଜାରି ରହିଛି । ଆଉ କେତେକ ନକ୍ସଲ ଆହତ ହୋଇ ଥାଇପାରନ୍ତି ବୋଲି ସନ୍ଦେହ କରାଯାଉଛି।
