ହୋଟେଲରୁ ଚୋରିକରି ମହିଳାଙ୍କ ସମେତ ୨ ଗିରଫ

ମୟୂରଭଞ୍ଜ ଜିଲା ମୋରଡ଼ା ଥାନା ଅଧୀନ ଧାନଶୋଳ–ଛୋଟରାୟପୁର ରାସ୍ତାପାର୍ଶ୍ୱ ଏକ ହୋଟେଲରୁ ଚୋରି ଘଟଣାରେ ଜଣେ ମହିଳାଙ୍କ ସମେତ ୨ ଜଣଙ୍କୁ ପୋଲିସ ଗିରଫ କରିଛି। ଗିରଫ ୨ ଅଭିଯୁକ୍ତ ହେଲେ ଯଶିପୁର ଥାନା ଅଧୀନ ବକଳା ଗ୍ରାମର ଅବଦୁଲ କାଦିର (ବାବଲୁ) ଏବଂ ବୈଶିଙ୍ଗା ଥାନା ଅଞ୍ଚଳର କଳ୍ପନା ଐଶ୍ୱରୀୟା (ପୁଷ୍ପା)। ଉକ୍ତ ଘଟଣାରେ ଜଣେ ନାବାଳକ ମଧ୍ୟ ସମ୍ପୃକ୍ତ ଥିବାର ପୋଲିସ ତଦନ୍ତରୁ ଜଣାପଡ଼ିଛି। ସୂଚନାଯୋଗ୍ୟ, ମାଲିକ ବିଦ୍ୟାଧର ମହାନ୍ତ ହୋଟେଲରେ ତାଲା ପକାଇ ଘରକୁ ଖାଇବା ପାଇଁ ଯାଇଥିବା ବେଳେ ତାଲା ଭାଙ୍ଗି ୩୨ ଇଞ୍ଚର ଏକ ଏଲ୍‌ସିଡି ଟିଭି, ବ୍ୟାଟେରୀ, ଇନଭର୍ଟର ଚୋରି ହୋଇଥିଲା। ବିଦ୍ୟାଧର ମୋରଡ଼ା ଥାନାରେ ଅଭିଯୋଗ କରିବା ପରେ ପୋଲିସ ତଦନ୍ତ କରିଥିଲା। ମୋରଡ଼ା ରାସ୍ତାରେ ଲଗାଯାଇଥିବା ସିସିଟିଭି ଫୁଟେଜରୁ ଏକ ନମ୍ବର ବିହୀନ ସ୍କୁଟିରେ ଜଣେ ଲୋକ ମହିଳାଙ୍କ ସହ ଆସି ଉକ୍ତ ଚୋରି ଜିନିଷ ନେଇଯାଉଥିବା ଦେଖିବାକୁ ମିଳିଥିଲା। ଥାନା ଅଧିକାରୀ ପଦ୍ମଲୋଚନ ପାଣିଗ୍ରାହୀଙ୍କ ତତ୍ତ୍ୱାବଧାନରେ ତଦନ୍ତ ପ୍ରକ୍ରିୟାକୁ ଜୋରଦାର କରାଯାଇ ଦୁଇଜଣଙ୍କୁ ଗିରଫ କରାଯାଇଛି।