ଢେଙ୍କାନାଳ: ଢେଙ୍କାନାଳ ଜିଲ୍ଲା ହିନ୍ଦୋଳ ନିର୍ବାଚନ ମଣ୍ଡଳୀରେ ନେତାଙ୍କ ମନୋବଳ ବଢାଇବା ପାଇଁ ସେଠାରେ ପହଞ୍ଚିଛନ୍ତି ଭିକେ ପାଣ୍ଡିଆନ। ପୁଣି ଥରେ ନବୀନ ସରକାର ଗଠନ କରିବା ପାଇଁ ଲୋକଙ୍କୁ ନିବେଦନ କରିଥିଲେ । ନିର୍ବାଚନୀ ପ୍ରଚାର କରି ନବୀନଙ୍କ ଗୁଣଗାନ କରିଥିଲେ। ଏହାସହ ବିଜେପି କରିଥିବା ପ୍ରେସମିଟକୁ ମଧ୍ୟ ଟାର୍ଗେଟ କରିଥିଲେ। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉପରେ ବର୍ଷିଲେ ବିଜେଡିର ବରିଷ୍ଠ ନେତା କାର୍ତ୍ତିକ ପାଣ୍ଡିଆନ୍। ପାଣ୍ଡିଆନ କହିଛନ୍ତି, ଆମ ପ୍ରିୟ ମୁଖ୍ୟମନ୍ତ୍ରୀଙ୍କୁ କେନ୍ଦ୍ରମନ୍ତ୍ରୀ ଅସମ୍ମାନ କରିଛନ୍ତି । ତାଙ୍କ ପ୍ରତି ଅଶାଳୀନ ଭାଷା ବ୍ୟବହାର କରୁଛନ୍ତି । ଏହା ସମସ୍ତଙ୍କୁ ଦୁଃଖ ଦେଉଛି । ମୁଖ୍ୟମନ୍ତ୍ରୀ ଓଡ଼ିଶାବାସୀଙ୍କୁ ପରିବାର ଭାବି ସୁଖ ଦୁଃଖରେ ଛିଡା ହେଉଛନ୍ତି। ଏଭଳି ମୁଖ୍ୟମନ୍ତ୍ରୀଙ୍କୁ କେହି ଅସମ୍ମାନ କଲେ ଓଡ଼ିଶାବାସୀ ତାଙ୍କୁ ଉଚିତ୍ ଜବାବ ଦେବେ ବୋଲି କହିଛନ୍ତି ପାଣ୍ଡିଆନ । ଅନ୍ୟପଟେ ହିନ୍ଦୋଳ କେନ୍ଦ୍ରମନ୍ତ୍ରୀଙ୍କ ନିଜ ଅଞ୍ଚଳ କିନ୍ତୁ ସେ ନିଜ ଅଞ୍ଚଳ ପାଇଁ କିଛି କରିପାରିଲେ ନାହିଁ। ୧୦ ବର୍ଷ କେନ୍ଦ୍ରମନ୍ତ୍ରୀ ରହିଲେ ମଧ୍ୟ ରାସ୍ତାଟିଏ କରିପାରିଲେନି। ମାଟିର ସେବା କରିବାକୁ ତାଙ୍କର ଆନ୍ତରିକତା ନାହିଁ । କେବଳ ମୁଖ୍ୟମନ୍ତ୍ରୀଙ୍କ ଚୌକି ପାଇଁ ତାଙ୍କର ଲୋଭ ରହିଛି । ନିଜ ଅଞ୍ଚଳ ହେଉ ଅବା ରାଜ୍ୟର ସେବା କରିବାକୁ କେନ୍ଦ୍ରମନ୍ତ୍ରୀଙ୍କ ଆନ୍ତରିକତା ନାହିଁ କି ସେବା ମନବୃତ୍ତି ନାହିଁ। ଖାଲି କ୍ଷମତା ଦରକାର, ଏଭଳି ଆଶା ରଖିଥିବା ଲୋକ କେବେ ଜନସାଧାରଣଙ୍କ ସେବା କରିବେ ନାହିଁ।
