ସ୍ୱାମୀକୁ ମାରି ପୋତିଦେବା ଘଟଣା,୫ ଅଭିଯୁକ୍ତ ଗିରଫ

ପାରିବାରିକ ବିବାଦରୁ ଜଣେ ସ୍ତ୍ରୀ ତାଙ୍କ ସ୍ୱାମୀକୁ ଜୀବନରୁ ମାରି ପୋତିଦେଇଥିବା ଘଟଣାରେ ସୁକିନ୍ଦା ପୋଲିସ ୫ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଘଟଣା ଘଟିଛି ସୁକିନ୍ଦା ଥାନା ଅନ୍ତର୍ଗତ ସଂସାଇଲୋ ଗ୍ରାମପଞ୍ଚାୟତ ଅଧୀନସ୍ଥ ଡୁବିଖାଲ ଗ୍ରାମରେ । ପାରିବାରିକ କଳହକୁ କେନ୍ଦ୍ରକରି ଡୁବିଖାଲ ଗ୍ରାମ ମୋରା ଦେଓଗମଙ୍କ ଝିଅ ଗୁମାରୀ ମୁଣ୍ଡା ତାଙ୍କ ସ୍ଵାମୀ ବାବୁଲି ମୁଣ୍ଡାଙ୍କୁ ଜୀବନରୁ ମାରି ଘର ପଛପଟ ବାଡ଼ିରେ ପୋତି ଦେଇଥିବା ଗତ ରବିବାର ସୁକିନ୍ଦା ଥାନାରେ ଆତ୍ମସମର୍ପଣ କରିବା ସହ ନିଜେ ସ୍ବୀକାର କରିଥିଲା । ଏନେଇ ସ୍ଥାନୀୟ ସରପଞ୍ଚ ମଧ୍ୟ ସୁକିନ୍ଦା ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ୪୮/୨୦୨୫ ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା। ସୋମବାର ଦିନ ସୁକିନ୍ଦା ତହସିଲଦାର ମାନସ ରଞ୍ଜନ ତ୍ରିପାଠୀ, କଳିଙ୍ଗନଗର ଅତିରିକ୍ତ ଆରକ୍ଷୀ ଅଧିକ୍ଷକ, ସାଇଣ୍ଟିଫିକ ଟିମ୍ , ଉପସ୍ଥିତିରେ ମାଟିତଳେ ପୋତା ହୋଇଥିବା ମୃତଦେହ ଉଦ୍ଧାର କରି ଆବଶ୍ୟକୀୟ ପ୍ରମାଣ ସଂଗ୍ରହ କରିବା ପରେ ଶବ ବ୍ୟବଚ୍ଛେଦ ପାଇଁ ପଠାଇଛି ପୋଲିସ । ଏହି ଘଟଣାକୁ ପୋଲିସ ଗୁରୁତର ସହ ନେବାସହ ଅତିରିକ୍ତ ଆରକ୍ଷୀ ଅଧିକ୍ଷକ ସୁପ୍ରସନ୍ନ ମଲ୍ଲିକ ନିଜେ ତଦନ୍ତ ଆରମ୍ଭ କରିଥିଲେ । ତଦନ୍ତ ପରେ ଏହା ଏକ ସଂଘବଦ୍ଧ ଆକ୍ରମଣ ବୋଲି ଜଣାପଡିଥିଲା । ଏହି ଘଟଣାରେ ପୋଲିସ ମୃତ ବାବୁଲିର ସ୍ତ୍ରୀ ଗୁମାରି, ଶ୍ଵଶୁର ମୋରା ଦେଓଗାମ,ଶାଶୁ ସିନି ଦେଓଗାମ ଶଳା ରାଜେନ୍ଦ୍ର କାଇକା ଓ ରାମସିଂ ବଦରାକୁ ଗିରଫ କରି ମଙ୍ଗଳବାର ଅପରାହ୍ନ 3 ଘଟିକା ସମୟରେ କୋର୍ଟ ଚାଲାଣ କରିଛି । ଦୁଃଖଦ ଦୃଶ୍ୟ ଏହି ଘଟଣାରେ ହତ୍ୟାକାରି ମହିଳା ଗୁମାରିର ଶିଶୁ ପୁତ୍ର ତା ସହିତ ଜେଲେ ଯାଇଥିବା ବେଳେ ଶିଶୁ କନ୍ୟାକୁ ସୁଧାର ଗୃହକୁ ପଠା ଯିବ ବୋଲି ସୂଚନା ମିଳିଛି ।