ସାମ୍ନାକୁ ଆସିଛି ବିଜେପିର ଦୋମୁହାଁ ନୀତି । ଯେଉଁ ପ୍ରସଙ୍ଗକୁ ଲକ୍ଷ୍ୟ କରି ନିର୍ବାଚନ ଜିତିଲା ବିଜେପି ଏବେ ସେହି ପ୍ରସଙ୍ଗକୁ ନେଇ ସ୍ୱର ବଦଳାଇଛି । ୨୦୨୪ ନିର୍ବାଚନରେ ଶ୍ରୀମନ୍ଦିର ରତ୍ନ ଭଣ୍ଡାର ଚାବି ହଜିଥିବା ନେଇ ଜୋରଦାର ବିଜେଡି ଉପରେ ବର୍ଷୁଥିଲା ବିଜେପି । ସେତେବେଳର ବିଜେଡିର ସର୍ବେସର୍ବା ରହିଥିବା ପାଣ୍ଡିଆନ ବାବୁ କାଳେ ଚାବି ଚୋରି କରି ରତ୍ନ ଭଣ୍ଡାରକୁ ଲୁଟି ଦେଇଛନ୍ତି ବୋଲି କହି ବୁଲୁଥିଲା ବିଜେପି । ଆଉ ବିଜେପି ସରକାରକୁ ଆସିଲେ ରତ୍ନ ଭଣ୍ଡାର ଚାବି ଖୋଜିଆଣି ଯାଞ୍ଚ କରିବ ବୋଲି ଲୋକଙ୍କୁ ପ୍ରତିଶ୍ରୁତି ଦେଇଥିଲା । ପ୍ରଧାନମନ୍ତ୍ରୀଙ୍କଠୁ ଆରମ୍ଭ କରି ଦଳର ମୁଖ୍ୟ ନେତା ମାନେ ରତ୍ନ ଭଣ୍ଡାରର ଚାବିକୁ ପ୍ରସଙ୍ଗ କରି ଖୁବ୍ ଜୋରରେ ବର୍ଷୁଥିଲେ ବିଜେଡି ଉପରେ । କିନ୍ତୁ ଏବେ ସରକାରକୁ ଆସିବା ପରେ ବିଜେପିର ଆଉ ଏକ ରୂପ ଦେଖିବାକୁ ମିଳିଛି ।
ରାଜ୍ୟ ସରକାର ସତ୍ୟପାଠ ଘୋଷଣା କରିଛନ୍ତି । ଆଉ ସତ୍ୟପାଠରେ ଉଲ୍ଲେଖ ରହିଛି ରତ୍ନ ଭଣ୍ଡାର ଚାବି ହଜିବା ଘଟଣାର ତଦନ୍ତ ରିପୋର୍ଟ ସାର୍ବଜନୀନ ହେବ ନାହିଁ । ଚାବି କାହିଁକି ହଜିଲା ଓ କେମିତି ହଜିଲା ଏନେଇ ରାଜ୍ୟବାସୀ ଜାଣନ୍ତୁ ବୋଲି ଚାହୁଁନାହିଁ ବିଜେପି ।
୨୦୧୮ରେ ରତ୍ନ ଭଣ୍ଡାର ଖୋଲାଯିବା ନେଇ ଏକ ୧୭ ଜଣିଆ ଟିମ୍ କରିଥିଲେ ତତକାଳୀନ ବିଜେଧି ସରକାର । ହେଲେ ଚାବି ନମିଳିବାରୁ ରତ୍ନ ଭଣ୍ଡାର ଖୋଲା ଯାଇ ନଥିଲା । ଏହାକୁ ନେଇ ପ୍ରବଳ ତମ୍ବିତୋଫାନ ହେବାକୁ ଜଷ୍ଟିସ୍ ରଘୁବୀର ଦାସଙ୍କ ନେତୃତ୍ୱରେ ତଦନ୍ତ କମିଶନ୍ ଗଠନ କରାଗଲା । ୨୦୧୮ ନଭେମ୍ବର ୨୯ରୁ କମିଶନଙ୍କ ରିପୋର୍ଟ ସରକାରଙ୍କ ହସ୍ତଗତ ହୋିଛି । ହେଲେ ରିପୋର୍ଟରେ କଣ ଅଛି ତାହା ଆଜି ପର୍ଯ୍ୟନ୍ତ କାହାରିକୁ ଜଣା ନାହିଁ ।
ରିପୋର୍ଟ ସାର୍ବଜନୀନ ହୋଇନଥିବାରୁ ଏହାକୁ ନେଇ ହାଇକୋର୍ଟରେ ଜନସ୍ୱାର୍ଥ ମାମଲା କରିଥିଲେ ପୁରୀର ସାମାଜିକ କର୍ମୀ ଦିଲ୍ଲୀପ କୁମାର ବରାଳ । ମାମଲାର ଶୁଣାଣିବେଳେ ୧୯ ଜୁନ୍ ୨୦୨୪ରେ ଏକ ସତ୍ୟପାଠ ଦେଇଥିଲେ ତତକାଳୀନ ବିଜେଡି ସରକାର । ରିପୋର୍ଟ ମିଳିସାରିଥିବା ଓ ଖୁବଶୀଘ୍ର କ୍ୟାବିନେଟ୍ରେ ଉପସ୍ଥାପନ କରିବା ନେଇ ସତ୍ୟପାଠରେ ଦର୍ଶାଇଥିଲେ ।
ତେବେ ଆଜି ମାମଲାର ଶୁଣାଣିବେଳେ ନୂଆ ସରକାର ମାମଲାକୁ କୋର୍ଟରେ ବିରୋଧ କରିଥିବା କହିଛନ୍ତି ଆବେଦନକାରୀଙ୍କ ଓକିଲ । ଏପରିକି ବିଜେପି ସରକାର ଏହାକୁ ବିରୋଧ କରି ସତ୍ୟପାଠରେ ଦର୍ଶାଇଛନ୍ତି ଯେ, ତଦନ୍ତ କମିଶନ ରିପୋର୍ଟ ସାର୍ବଜନୀନ କରିବାକୁ ବାଧ୍ୟ ନୁହନ୍ତି । କୋର୍ଟ ମଧ୍ୟ ସରକାରଙ୍କୁ ଏଥିପାଇଁ ବାଧ୍ୟ କରିପାରିବେ ନାହିଁ ।
