ମୋବାଇଲ ଲାଇଟରେ ଅସ୍ତ୍ରୋପଚାର

ସ୍ୱାସ୍ଥ୍ୟ ଅବସ୍ଥାର ବିକଳ ଚିତ୍ର କେବଳ ଦୁର୍ଗମ ଅଂଚଳରେ ନୁହେଁ, ବଡ ବଡ ସହରରେ ମଧ୍ୟ ଦେଖିବାକୁ ମିଳୁଛି ।ଆଜିର ଆଧୁନିକ ଦୁନିଆରେ ବି ମେଡିକାଲରେ ବିଦ୍ୟୁତ ବ୍ୟବସ୍ଥା ନାହିଁ । ଯାହା ଫଳରେ ମେଡିକାଲରେ ମୋବାଇଲ ଲାଇଟରେ ହେଉଛି ପ୍ରସବ ।ଏଭଳି ଅଭାବନୀୟ ଘଟଣା ସାମ୍ନାକୁ ଆସିଛି ମେଟ୍ରୋସିଟି ମୁମ୍ବାଇରେ । ଯାହାକୁ ନେଇ ଡାକ୍ତର ଓ ହସ୍ପିଟାଲ କର୍ତୃପକ୍ଷଙ୍କ ବିରୋଧରେ ଦୃଢକାର୍ଯ୍ୟାନୁଷ୍ଠାନ ଦାବି କରିଛନ୍ତି ପରିବାର ଲୋକେ । ଘଟଣା ମୁତାବକ, ଖୁସରୁଦ୍ଦୀନ ଅନସାରୀ ନାମକ ଦିବ୍ୟାଙ୍ଗ ବ୍ୟକ୍ତିଙ୍କ ପତ୍ନୀ ସାହିଦୁନଙ୍କୁ ପ୍ରସବ ନିମନ୍ତେ ସୁଷମା ସ୍ୱରାଜ ମ୍ୟାଟରନିଟି ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଲାଇଟ କଟି ଯାଇଥିବାବେଳେ ଦୀର୍ଘସମୟ ପର୍ଯ୍ୟନ୍ତ ଜେନେରେଟର ବି ଲଗାଇନଥିଲେ ହସ୍ପିଟାଲ କର୍ତୃପକ୍ଷ ।ଫଳରେ ଉକ୍ତ ସମୟରେ ମୋବାଇଲ ଲାଇଟରେ ସାହିଦୁନଙ୍କ ଅସ୍ତ୍ରୋପଚାର କରାଯାଇଥିଲା। ଅପରେସନ ଟେବୁଲ ଉପରେ ଶିଶୁଟି ଆଖି ବୁଜି ଦେଇଥିବା ବେଳେ ସାହିଦୁନଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ଅନ୍ୟତ୍ର ନେଇଯିବାକୁ ମେଡିକାଲ କର୍ତ୍ତୃପକ୍ଷ ସୂଚନା ଦେଇଥିଲେ। ମାତ୍ର ବାଟରେ ସାହିଦୁନ ବି ଆଖି ବୁଜି ଦେଇଥିଲେ।ମେଡିକାଲ କର୍ତ୍ତୃପକ୍ଷଙ୍କ ଚରମ ଖାମଖିଆଲିପଣ ତଥା ମୋବାଇଲ ଲାଇଟ୍‌ରେ ଅପରେସନ କରିବାରୁ ଉଭୟ ମା’ ଓ ଶିଶୁଙ୍କ ଜୀବନ ଚାଲି ଯାଇଥିବା ଖୁସରୁଦ୍ଦିଦ ଅନସାରୀଙ୍କ ପରିବାର ଲୋକେ ଅଭିଯୋଗ କରିଥିଲେ। ତେଣୁ ଡାକ୍ତର ତଥା ହସ୍ପିଟାଲ କର୍ତ୍ତୃପକ୍ଷଙ୍କ ବିରୋଧରେ ଦୃଢ କାର୍ୟ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବି କରିଛନ୍ତି।