ମହାରାଷ୍ଟ୍ରରେ ଆଜିଠାରୁ ୧୪୪ ଧାରା ଲାଗୁ

ମୁମ୍ୱାଇ: ମହାରାଷ୍ଟ୍ରରେ କୋଭିଡ ସଂକ୍ରମିତଙ୍କ ସଂଖ୍ୟା ବଢ଼ୁଥିବା ଦେଖି ଆଜିଠାରୁ ସାରା ରାଜ୍ୟରେ ୧୪୪ ଧାରା ଲାଗୁ ହେବ। ମଙ୍ଗଳବାର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଏହି ଘୋଷଣା କରିଛନ୍ତି। ଆଜି ରାତି ୮ଟାରୁ ଏହି କଟକଣା ଆସନ୍ତା ୧୫ ଦିନ ପାଇଁ ଲାଗୁ ହେବ। ଆଜି ମହାରାଷ୍ଟ୍ରରେ ୬୦ ହଜାରରୁ ଅଧିକ ନୂଆ ମାମଲା ସାମ୍ନାକୁ ଆସିଛି। ଏହି ସମୟରେ ମୁମ୍ବାଇ ଲୋକାଲ୍‍ ଟ୍ରେନ୍‍ ଓ ବସ୍‍ ସେବା ଭଳି ସାର୍ବଜନିକ ପରିବହନ ବ୍ୟବସ୍ଥାକୁ ବନ୍ଦ କରାଯିବ ନାହିଁ। ତେବେ କେବଳ ଅତ୍ୟାବଶ୍ୟକ ସେବା ପ୍ରଦାନକାରୀ ସଂସ୍ଥାଗୁଡ଼ିକର କର୍ମଚାରୀମାନେ ଏଥିରେ ଯାତାୟାତ କରିପାରିବେ।କରୋନା ସଂକ୍ରମଣ ରୋକିବା ପାଇଁ ମହାରାଷ୍ଟ୍ର ସରକାର ଏଭଳି ପଦକ୍ଷେପକୁ ‘ବ୍ରେକ୍ ଦ ଚେନ୍’ ଅଭିଯାନ କହିଛନ୍ତି। ଏବେ ବିନା କାରଣରେ ଲୋକମାନେ ଘରୁ ନବାହାରିବାକୁ ନିବେଦନ କରିଛନ୍ତି ଉଦ୍ଧବ। ଏଥିସହ ମହାରାଷ୍ଟ୍ରରେ ଯିବା ଆସିବା ଉପରେ ପ୍ରତିବନ୍ଧକ ଲାଗୁ କରିଛନ୍ତି ମୁଖ୍ୟମନ୍ତ୍ରୀ। ରେଷ୍ଟୁରାଣ୍ଟରେ ଖାଇବା ଉପରେ କଟକଣା ଲଗାଇ ଅନ୍ ଲାଇନ୍ ଡେଲିଭରିକୁ ଗୁରୁତ୍ୱ ଦେଇଛନ୍ତି ମହାରାଷ୍ଟ୍ର ସରକାର। ଏହି ସମୟରେ ଜରୁରି ସେବାକୁ ଛାଡ଼ି ଅନ୍ୟ ସମସ୍ତ ଅଫିସ୍ ୧୫ ଦିନ ବନ୍ଦ ରହିବ। ଇ-କମର୍ସ ସେବା, ପେଟ୍ରୋଲ ପମ୍ପ, ବ୍ୟାଙ୍କ ଓ ପରିବହନ ସେବା ଚାଲୁ ରହିବ।  ଗଣମାଧ୍ୟମ ପ୍ରତିନିଧିଙ୍କ ଯିବା ଆସିବା ଉପରେ କୌଣସି ପ୍ରତିବନ୍ଧକ ରହିବ ନାହିଁ। ସକାଳ ୭ଟାରୁ ରାତି ୮ଟା ପର୍ଯ୍ୟନ୍ତ ଅତ୍ୟାବଶ୍ୟକ ସେବା ମିଳିବ। ସପିଂ ସେଣ୍ଟର, ମଲ୍, ଫିଲ୍ମ ସୁଟିଂ, ବେଳାଭୂମି ବନ୍ଦ ରହିବ। ଏହା ସଂପୂର୍ଣ୍ଣ ଲକଡାଉନ ନୁହେଁ ବରଂ କଡ଼ା କଟକଣା ବୋଲି ସରକାର କହିଛନ୍ତି। ଜୀବୀକା ସହିତ ଲୋକଙ୍କ ଜୀବନ ମଧ୍ୟ ଗୁରୁତ୍ୱପୂର୍ଣ୍ଣ  ତେଣୁ ଏଭଳି କଡ଼ା ପଦକ୍ଷେପ ନେବାକୁ ପଡ଼ିଛି ବୋଲି କହିଛନ୍ତି ମୁଖ୍ୟମନ୍ତ୍ରୀ ଉଦ୍ଧବ ଠାକରେ।