ମର୍ମନ୍ତୁଦ ଦୁର୍ଘଟଣାରେ ୪ ଗୁରୁତର, ରକ୍ଷା ପାଇଲା ନିଷ୍ପାପ ଶିଶୁ

୫୩ନଂ ଜାତୀୟ ରାଜପଥ ସୁକିନ୍ଦା ଭୁବନ ରାସ୍ତାର ପୋବଳ ଛକ ନିକଟରେ ଏକ ମର୍ମନ୍ତୁଦ ଦୁର୍ଘଟଣା ଘଟି ୪ଜଣ ଗୁରୁତର ଅବସ୍ଥାରେ ସୁକିନ୍ଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିବା ଜଣାପଡିଛି। ପୋବଳ ଗ୍ରାମର ଅର୍ଜୁନ ସିଂକୁଙ୍କ ପୁଅ ଟୁନା ସିଂକୁ(୨୭), ଝିଅ ସମ୍ବାରୀ ସିଂକୁ(୩୦), ନାତି(୧) ଓ ବିଦ୍ୟାଧର ବାନରାଙ୍କ ପତ୍ନୀ ତିଉ ବାନରା ଭୁବନ ଯିବା ପାଇଁ ବସକୁ ଅପେକ୍ଷାକରି ପୋବଳ ଛକ ନିକଟରେ ଠିଆ ହୋଇଥିଲେ।ସେହି ସମୟରେ ଭୁବନ ଯାଉଥିବା ଏକ ଯାତ୍ରୀବାହୀ ଟାଟା ମ୍ୟାଜିକ ସେମାନଙ୍କୁ ଦେଖି ଅଟକିଥିଲା। ଠିକ୍ ସେହି ସମୟରେ ଏକ ଦ୍ରୁତଗାମୀ ହାଇୱା ମ୍ୟାଜିକକୁ ପଛପଟୁ ଧକ୍କା ଦେଇଥିଲା। ଏହି ଦୁର୍ଘଟଣାରେ ମ୍ୟାଜିକ ଓଲଟି ପଡ଼ି ଅପେକ୍ଷା କରିଥିବା ଯାତ୍ରୀଙ୍କୁ ଧକା ଦେଇଥିଲା। ମ୍ୟାଜିକ ଦୁର୍ଘଟଣାରେ ଟୁନା, ସଂବାରୀ, ତିୟୁ ଓ ଡ୍ରାଇଭର ଉତ୍ତମ ଦାସ(୪୦) ଆହତ ହୋଇଥିବା ବେଳେ ତାଙ୍କ ସହ ଥିବା ଏକ ବର୍ଷର ନିଷ୍ପାପ ଶିଶୁପୁତ୍ର ସମ୍ପୂର୍ଣ୍ଣ ସୁସ୍ଥ ଥିବା ଜଣାପଡିଛି। ଖବର ପାଇ ସୁକିନ୍ଦା ଦମକଳ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ଆହତ ମାନଙ୍କୁ ଉଦ୍ଧାର କରି ସୁକିନ୍ଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ସମସ୍ତଙ୍କର ଚିକିତ୍ସା ଜାରୀ ରହିଛି। ତିୟୁ ଅବସ୍ଥା ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ ତୁରନ୍ତ କଟକ ସ୍ଥାନାନ୍ତର କରାଯାଇଛି।