ଭୁବନେଶ୍ୱର : ଛାତ୍ର ସଂସଦ ନିର୍ବାଚନ ପାଇଁ ଅଧିକାଂଶ ଛାତ୍ର ସଙ୍ଗଠନ ଆଗ୍ରହ ପ୍ରକାଶ କରୁଥିବାବେଳେ ବହୁ ଅଧ୍ୟକ୍ଷ କିନ୍ତୁ ନିର୍ବାଚନ ସପକ୍ଷରେ ନାହାନ୍ତି । ଏଠାରେ ଅନୁଷ୍ଠିତ ଡିଗ୍ରୀ କଲେଜ ଅଧ୍ୟକ୍ଷମାନଙ୍କ ସମ୍ମିଳନୀରେ ଯୋଗ ଦେବାକୁ ଆସିଥିବାବେଳେ ବହୁ ଅଧ୍ୟକ୍ଷ ବ୍ୟକ୍ତିଗତ ଭାବେ ଏଭଳି ମତ ରଖିଛନ୍ତି ।
ଏଠାରେ ଉଲ୍ଲେଖନୀୟ ଯେ, ୨୦୧୭ ପରଠାରୁ ରାଜ୍ୟରେ ଆଉ ଛାତ୍ର ସଂସଦ ନିର୍ବାଚନ ହେଉନାହିଁ । ସେତେବେଳେ ବିଭିନ୍ନ ସ୍ଥାନରେ ହୋଇଥିବା ହିଂସାକାଣ୍ଡକୁ ଆଳ କରି କଲେଜ ଓ ବିଶ୍ୱବିଦ୍ୟାଳୟ କ୍ୟାମ୍ପସ୍ରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହେବା ଆଶଙ୍କାରେ ସରକାର ଛାତ୍ର ସଂସଦ ନିର୍ବାଚନ ବନ୍ଦ ରଖିଛନ୍ତି । ପୂର୍ବରୁ କଲେଜ ଓ ବିଶ୍ୱବିଦ୍ୟାଳୟ ଗୁଡିକ ନିଜ ନିଜର ସୁବିଧା ଅନୁଯାୟୀ ଅଗଷ୍ଟ-ସେପ୍ଟେମ୍ବର ମାସରେ ଛାତ୍ର ସଂସଦ ନିର୍ବାଚନ କରାଉଥିଲେ । ପରବର୍ତ୍ତୀ ସମୟରେ ରାଜ୍ୟ ସରକାର ଗୋଟିଏ ଦିନରେ ସାରା ରାଜ୍ୟରେ ଏହି ନିର୍ବାଚନ କରାଇଲେ ।
ତେବେ ଗତ କିଛିବର୍ଷ ଧରି ବିଶ୍ୱ ବିଦ୍ୟାଳୟ ଓ କଲେଜ କ୍ୟାମ୍ପସ୍ରେ ରାଜନୈତିକ ଦଳମାନେ ନିଜର ଦବ୍ଦବା ଜାହିର କରିବା ପାଇଁ ବିପୁଳ ଅର୍ଥ ଖର୍ଚ୍ଚ କରି ଛାତ୍ର ସଂସଦ ନିର୍ବାଚନକୁ ବ୍ୟୟବହୁଳ କରାଇଛନ୍ତି । ଏହାଛଡା ସ୍ଥାନୀୟ ନେତାମାନେ ନିଜ ନିଜର ଦବ୍ଦବା ଜାହିର କରିବା ପାଇଁ ଯେକୌଣସି ପ୍ରକାରେ ଛାତ୍ର ସଂସଦ ଦଖଲ କରିବା ଲାଗି ଅଭିଯାନ ଚଳାଇବାରୁ ଉତ୍ତେଜନା ବୃଦ୍ଧି ପାଉଥିଲା ।
ଏହାଛଡା ନିଜ ନିଜ ନିର୍ବାଚନ ମଣ୍ଡଳୀରେ ବିଧାୟକ ଓ ଅନ୍ୟ ନିର୍ବାଚିତ ଲୋକ ପ୍ରତିନିଧି ଓ ସେମାନଙ୍କ ପ୍ରତିଦ୍ୱନ୍ଦୀମାନେ ଛାତ୍ର ସଂସଦ ନିର୍ବାଚନକୁ ମର୍ଯ୍ୟାଦାର ପ୍ରସଙ୍ଗ ଭାବେ ଗ୍ରହଣ କରିବା ଯୋଗୁ ଉଚ୍ଚ ଶିକ୍ଷାନୁଷ୍ଠାନ ଗୁଡିକରେ ବାହାର ଅଣଛାତ୍ର ଓ ଅସାମାଜିକ ବ୍ୟକ୍ତିଙ୍କ ଦୌରାତ୍ମ୍ୟ ବୃଦ୍ଧି ପାଉଥିଲା । ଏଥିଯୋଗୁ ଶୈକ୍ଷିକ ବାତାବରଣ ମଧ୍ୟ କ୍ଷତିଗ୍ରସ୍ତ ହେଉଥିବା କଥା ନିଜ ନାମ ଗୋପନ ରଖିବା ସର୍ତ୍ତରେ କେତେକ ଅଧ୍ୟକ୍ଷ ସ୍ୱୀକାର କରିଛନ୍ତି ।
ଏହି ଅଧ୍ୟକ୍ଷମାନେ କହିଛନ୍ତି ଯେ ସଂଖ୍ୟାଧିକ କଲେଜରେ ନିୟମିତ ଅଧ୍ୟକ୍ଷ ନଥିବାରୁ ଭାରପ୍ରାପ୍ତ ଅଧ୍ୟକ୍ଷମାନଙ୍କ ଦ୍ୱାରା କୌଣସି ପ୍ରକାରେ କଲେଜ ଗୁଡିକ ଚାଲିଛି । ଏହାଛଡ଼ା କଲେଜ ଗୁଡିକରେ ବ୍ୟାପକ ସଂଖ୍ୟକ ଅଧ୍ୟାପକ ପଦବୀ ବର୍ଷ ବର୍ଷ ଧରି ଖାଲି ପଡିଛି । ଫଳରେ ନିର୍ବାଚନ ହେଲେ ବିଭିନ୍ନ ଛାତ୍ର ଗୋଷ୍ଠୀଙ୍କୁ ନିୟନ୍ତ୍ରଣ କରିବା କଲେଜ କର୍ତ୍ତୃପକ୍ଷଙ୍କ ଲାଗି ସମସ୍ୟା ସୃଷ୍ଟି କରୁଛି । ଶିକ୍ଷକ ସହିତ ବହୁ ଅଣଶିକ୍ଷକ ପଦବୀ ମଧ୍ୟ କଲେଜ ଗୁଡିକରେ ଖାଲି ପଡିଛି ।
