ପଦ୍ମ ଧରିଲେ ସାଂସଦ ଅନୁଭବ । ବିଜେଡିରୁ ଇସ୍ତଫା ଦେବା ପରେ ବିଜେପିରେ ସାମିଲ ହେଲେ କେନ୍ଦ୍ରାପଡା ସାଂସଦ ଅନୁଭବ ମହାନ୍ତି । ତେବେ କିଛିଦିନ ପୂର୍ବରୁ ସାଂସଦ ଅନୁଭବ ମହାନ୍ତି ବିଜୁ ଜନତା ଦଳରୁ ଇସ୍ତଫା ଦେଇଥିଲେ । ସେ ନିଜ ଇସ୍ତଫାପତ୍ର ବିଜେଡି ସଭାପତି ନବୀନ ପଟ୍ଟନାୟକଙ୍କ ନିକଟକୁ ପଠାଇଥିଲେ । ଏହାପରେ ଅନୁଭବ ବିଜେପିରେ ସାମିଲ ହେବେ ବୋଲି ଚର୍ଚ୍ଚା ଜୋର ଧରିଥିଲା । ଶେଷରେ ସବୁ କଳ୍ପନା ଜଳ୍ପନାର ଅନ୍ତ ଘଟାଇ ଆଜି ଦିଲ୍ଲୀ ବିଜେପି ମୁଖ୍ୟାଳୟରେ ବିଜେପିରେ ସାମିଲ ହୋଇଛନ୍ତି ସାଂସଦ ଅନୁଭବ ମହାନ୍ତି । ସାମିଲ ହେବା ପରେ ସେ ନିଜ ପରିବାର ବନ୍ଧୁ ତଥା ସମର୍ଥକ ମାନଙ୍କୁ ଧନ୍ୟବାଦ ଦେବାସହ ଦେଶର ବିକାଶରେ ସାମିଲ ହେବାପାଇଁ ଯୁବପିଢୀମାନଙ୍କୁ ଆହ୍ୱାନ ଦେଇଛନ୍ତି । କିଛି ମାସ ହେଲା ବିଜେଡିର ଦଳୀୟ କାର୍ୟ୍ୟକ୍ରମରୁ ଦୂରେଇ ରହୁଥିଲେ ଅନୁଭବ । ନିଜ ନିର୍ବାଚନ ମଣ୍ଡଳୀ କେନ୍ଦ୍ରାପଡ଼ାରେ ମଧ୍ୟ ଦେଖିବାକୁ ମିଳୁନଥିଲା। ଗତକାଲି ବିଜେପିରେ ସାମିଲ ହୋଇଥିଲେ ପୂର୍ବତନ କୋରେଇ ବିଧାୟକ ତଥା ଓଲିଉଡ୍ ଅଭିନେତା ଆକାଶ ଦାସନାୟକ । ରାଜ୍ୟ ବିଜେପି କାର୍ୟ୍ୟାଳୟରେ ସଭାପତି ମନମୋହନ ସାମଲଙ୍କ ଉପସ୍ଥିତିରେ ବିଧିବଦ୍ଧ ଭାବେ ସାମିଲ ହୋଇଥିଲେ ଆକାଶ । ପୂର୍ବରୁ ଅଭିନେତା ସିଦ୍ଧାନ୍ତ ମହାପାତ୍ର ଓ ଅରିନ୍ଦମ ରାୟ ମଧ୍ୟ ବିଜେଡି ଛାଡ଼ି ବିଜେପିରେ ମିଶିଥିଲେ।
