ଧଳାଜହର କାରବାରରେ ଯୁବକ ଗିରଫ ; ୩୮୦୦ଟଙ୍କା ଜଵତ କରିଛି ପୋଲିସ

ଦାନଗଦି ହାଟରେ ଧଳାଜହର କାରବାର ପାଇଁ ଜଣେ ଯୁବକଙ୍କୁ ପୋଲିସ ଗିରଫ କରିଛି । ଯାଜପୁର ରୋଡ ଓ କଳିଙ୍ଗନଗର ଶିଳ୍ପାଞ୍ଚଳରେ ଦିନକୁ ଦିନ ବ୍ରାଉନସୁଗାର ବେପାର ବଢୁଥିବା ଅଭିଯୋଗ ପରେ ପୋଲିସ ଆକ୍ସନ ନେଇଛି। ପୋଲିସ ଵ୍ରାଉନସୁଗାର ଵେପାରୀଙ୍କ ଉପରେ ନଜର ରଖି ଜଣେ ବେପାରୀଙ୍କୁ ଗିରଫ କରିବାରେ ସଫଳ ହୋଇଛି ।  ପୂର୍ବରୁ ସୂଚନା ପାଇ ଦାନଗଦି ଫାଣ୍ଡି ଅଧିକାରୀ ଗୋବର୍ଦ୍ଧନ ନାୟକ ସଦଳବଳେ ଚଢ଼ାଉ କରିଥିଲେ । ଘଟଣା ସ୍ଥଳରୁ ପ୍ରାୟ ୩୦ହଜାର ଟଙ୍କା ମୂଲ୍ୟର ୫୦ପୁଡିଆ ବ୍ରାଉନସୁଗାର ଜବତ ହୋଇଥିଲା । ଏହା ସହ ମୟୁରଭଞ୍ଜର ଦେବବ୍ରତ ସାହୁ ଧରାପଡିଥିଲେ । ତେବେ ଚକମା ଦେଇ ୨ଜଣ ଚମ୍ପଟ ମାରିବାରେ ସଫଳ ହୋଇଥିଲେ । ଧରାପଡିଥିବା ଯୁବକ ଠାରୁ ୩୮୦୦ଟଙ୍କା ଜଵତ କରାଯାଇଥିଲା । ଧଳାଜହର କାରବାରର ଲିଙ୍କ୍ ବାଲେଶ୍ବରରୁ ଥିବା ପୋଲିସ ଜାଣିବାକୁ ପାଇଛି । ଗିରଫ ଯୁବକଙ୍କ ବିରୋଧରେ ଏକ ମାମଲା ରୁଜୁ କରାଯାଇ ପୋଲିସ କୋର୍ଟ ଚାଲାଣ କରିଛି ।