ଦେଶ ପାଳୁଛି କାରଗିଲ ବିଜୟ ଦିବସ

ଆଜି ଦେଶ ପାଳୁଛି ୨୫ ତମ କାରଗିଲ ବିଜୟ ଦିବସ । ୨୫ ବର୍ଷ ତଳେ ଆଜିର ଦିନରେ ଯୁଦ୍ଧଭୂମିରେ ଶତ୍ରୁମାନଙ୍କୁ ନିଜର ଅଦମ୍ୟ ସାହସ ଓ ଶୌର୍ଯ୍ୟର ପରିଚୟ ଦେଇଥିଲା ଭାରତୀୟ ସେନା । ଆଉ ଯାହାକୁ ନେଇ ଆଜି ବି ଗର୍ବ କରୁଛି ସାରା ଦେଶ ଓ ଦେଶବାସୀ । ଆଜି ହେଉଛି ସେହି କାରଗିଲ ବିଜୟ ଦିବସ । ଆଜି ସାରା ଭାରତ ପାଳୁଛି କାରଗିଲ ବିଜୟ ଦିବସର ୨୫ ବର୍ଷ ପୂର୍ତ୍ତି ବା ରୌପ୍ୟ ଜୟନ୍ତୀ । ଏହି ଅବସରରେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲଦାଖସ୍ଥିତ କାରଗିଲ ଯୁଦ୍ଧ ସ୍ମାରକୀ ସ୍ଥଳରେ ପହଞ୍ଚି ଭାରତ- ପାକିସ୍ତାନ ଯୁଦ୍ଧରେ ନିଜ ପ୍ରାଣବଳି ଦେଇଥିବା ଯବାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ଏଥିସହ ସେଠାରୁ ପାକିସ୍ତାନକୁ ଟାର୍ଗେଟ କରି ମୋଦି କହିଛନ୍ତି, ସବୁ ଆତଙ୍କୀ ଷଡ଼ଯନ୍ତ୍ରରେ ଫେଲ୍ ମାରିଛି ପାକିସ୍ତାନ । ନିଜ ଇତିହାସ ଦେଖି କିଛି ବି ଶିଖିପାରିଲାନି। କିଛି ଲୋକେ ଭାବୁଛନ୍ତି ସେନା ରାଜନେତାଙ୍କୁ ସାଲୁଟ୍ କରିବା ପାଇଁ, ପରେଡରେ ଭାଗ ନେବା ପାଇଁ ରହିଛନ୍ତି । କିନ୍ତୁ ତାହା ସମ୍ପୂର୍ଣ୍ଣ ଭୁଲ୍। ସେନା ହେଉଛି ଭାରତର ୧୪୦ କୋଟି ଦେଶବାସୀଙ୍କ ବିଶ୍ୱାସ ଓ ଭରସାର ପ୍ରତୀକ ବୋଲି କହିଛନ୍ତି ପ୍ରଧାନମନ୍ତ୍ରୀ। ଏହାସହ ବିରୋଧୀଙ୍କୁ ଏହି ମଞ୍ଚରୁ କଡ଼ା ଭାଷାରେ ସମାଲୋଚନା କରିଛନ୍ତି ପ୍ରଧାନମନ୍ତ୍ରୀ। ଏହାପରେ ପ୍ରଧାନମନ୍ତ୍ରୀ ମୋଦି ଲଦାଖସ୍ଥିତ ଦ୍ରାସ ଅଞ୍ଚଳରେ ଥିବା କାରଗିଲ ୱାର ମେମୋରିଆଲ ବି ପରିଦର୍ଶନ କରିଛନ୍ତି। ଏହାକୁ ଲଦାଖର ପ୍ରବେଶ ଦ୍ୱାର କୁହାଯାଇଥାଏ। ପ୍ରତିବର୍ଷ ୨୬ ଜୁଲାଇରେ କାରଗିଲ ବିଜୟ ଦିବସ ପାଳିତ ହୋଇଥାଏ। କିନ୍ତୁ ଚଳିତ ବର୍ଷ କାରଗିଲ ବିଜୟ ଦିବସର ୨୫ ବର୍ଷପୂର୍ତ୍ତି ଅବସରରେ ରଜତ ଜୟନ୍ତୀ ପାଳିତ ହେଉଛି। ଏହି ଅବସରରେ କାରଗିଲ ଯୁଦ୍ଧ ଶହୀଦଙ୍କ ପରିବାରବର୍ଗ ବି ଉପସ୍ଥିତ ଥିଲେ। ନିଜ ଲଦାଖ ଗସ୍ତ ଅବସରରେ ପ୍ରଧାନମନ୍ତ୍ରୀ ମୋଦି ସିଙ୍କୁନ ଲା ସୁଡ଼ଙ୍ଗ ଯୋଜନାର ପ୍ରଥମ ବିସ୍ଫୋରଣ କରିବେ । ଏହି ସୁଡ଼ଙ୍ଗ ନିର୍ମାଣ ହେଲେ ଏହାର ବିଶ୍ୱର ସବୁଠୁ ଉଚ୍ଚତମ ସୁଡ଼ଙ୍ଗ ହେବ । ଏହି ପ୍ରକଳ୍ପ ୪.୧ କିମି ଲମ୍ବା ହେବ । ନିମୁ- ପଦୁମ- ଦାରଚା ରୋଡରେ ୧୫,୮୦୦ ଫୁଟ ଉଚ୍ଚତାରେ ଏହି ପାସ୍‌ ନିର୍ମାଣ କରାଯାଉଛି। ବର୍ଷର ଅଧିକାଂଶ ସମୟ ଖରାପ ପାଗ ଯୋଗୁ ଲଦାଖକୁ ଯୋଗାଯୋଗ ବିଚ୍ଛିନ୍ନ ହୋଇ ଯାଉଛି। ମାତ୍ର ଏହି ସୁଡ଼ଙ୍ଗ ନିର୍ମାଣ ହେଲେ ଏହି ଅଞ୍ଚଳ ଆଉ ସମଗ୍ର ଦେଶଠୁ ଭିନ୍ନ ହୋଇ ରହିବ ନାହିଁ। ବର୍ଷ ସାରା ଲଦାଖକୁ ଯାତାୟତ ହୋଇ ପାରିବ ।