ସୁକିନ୍ଦା,୨୩/୦୪/୨୦୨୪: କୋଇଲା ବୋଝେଇ ଟ୍ରକରେ ଲାଗିଲା ନିଆଁ । ଏଭଳି ଅଘଟଣ ସୁକିନ୍ଦା ଥାନା ଅନ୍ତର୍ଗତ ସତସଙ୍ଗ ବିହାର ସମ୍ମୁଖସ୍ଥ ମୁଖ୍ୟ ରାଜପଥରେ ସୋମବାର ରାତି ୨ ଘଟିକା ସମୟରେ ଏକ କୋଇଲା ବୋଝେଇ ଟ୍ରକରେ ନିଆଁ ଲାଗି ଧ୍ୱସ୍ତବିଧ୍ୱସ୍ତ ହୋଇଯାଇଥିବା ଦେଖିବାକୁ ମିଳିଥିଲା । ସୂଚନା ମୁତାବକ ମହମ୍ମଦ ଅଖ୍ତର ନାମକ ବ୍ୟକ୍ତି ତାଙ୍କ ଟ୍ରକକୁ ସୁକିନ୍ଦା ସତସଙ୍ଗ ବିହାର ସମ୍ମୁଖସ୍ଥ ମୁଖ୍ୟ ରାଜପଥ କଡରେ ଥିବା ଏକ ଗ୍ୟାରେଜରେ ରଖିଥିଲେ । ହଠାତ୍ ସେହି ଟ୍ରକରେ ନିଆଁ ଲାଗିଯିବାରୁ ସ୍ଥାନୀୟ ଲୋକେ ଏକାଠି ହୋଇଥିଲେ ଏବଂ ନିଆଁକୁ ନିୟନ୍ତ୍ରଣ କରିବା ନିମନ୍ତେ ଅଗ୍ନିଶମ ବିଭାଗ ସହ ଯୋଗାଯୋଗ କରିଥିଲେ । ସୂଚନା ପାଇବା ମାତ୍ରେ ଅଗ୍ନିଶମ ବିଭାଗ ଅଫିସର ରଜନୀକାନ୍ତ ସାମଲ ଏକ ସ୍ୱତନ୍ତ୍ର ଟିମକୁ ନେଇ ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ନିୟନ୍ତ୍ରଣ କରିଥିଲେ । କିନ୍ତୁ ସେତିକି ବେଳକୁ ଟ୍ରକଟି ସମ୍ପୂର୍ଣ୍ଣ ରୂପେ ଜଳି ପୋଡି ନଷ୍ଟ ହୋଇସାରିଥିଲା । ତେବେ ଟ୍ରକରେ ନିଆଁ ଲାଗିବାର କାରଣ କ’ଣ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।
