ମହାକୁମ୍ଭ ଫେମ୍ ଆଇଆଇଟି ବାବା ଅଭୟ ସିଂହ ନିକଟ ଅତୀତରେ ବାରମ୍ବାର ବିବାଦରେ ଫସି ଚାଲିଛନ୍ତି । ପ୍ରଥମେ ଭାରତପାକିସ୍ତାନ ମ୍ୟାଚ୍ ବିଷୟରେ ତାଙ୍କର ଭବିଷ୍ୟବାଣୀ ଏବଂ ତା’ପରେ ନ୍ୟୁଜ୍ ଚ୍ୟାନେଲ ଷ୍ଟୁଡିରେହାଇ–ଭୋଲଟେଜ୍ ଡ୍ରାମାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ଆଉ ଏବେ ନିଜ ପାଖରେ ଗଞ୍ଜେଇ ରଖିବା ଅଭିଯୋଗରେ ଗିରଫ କରିଛି ପୋଲିସ । ଅଭୟ ସିଂହଙ୍କୁ ଆଜି ଜୟପୁର ପୋଲିସ୍ ଗିରଫ କରିଛି । ଆଇଆଇଟି ବାବା ସୋସିଆଲ୍ ମିଡିଆରେ ସୁଇସାଇଡ୍ କରିବାର ଧମକ ଦେଇଥିଲେ । ଏହା ପରେ ଶିପ୍ରା ପଥ ଥାନା ପୋଲିସ୍ ଆଇଆଇଟି ବାବା ରହୁଥିବା ରିଦ୍ଧି ସିଦ୍ଧି ପାର୍କ କ୍ଲାସିକ୍ ହୋଟେଲରେ ପହଞ୍ଚି ତାଙ୍କୁ ଗିରଫ କରିଛି ।
ସୂଚନାନୁସାରେ , ଅଭୟ ସିଂହଙ୍କ ପାଖରୁ ଗଞ୍ଜେଇ ଜବତ ହୋଇଛି । ତାଙ୍କ ବିରୁଦ୍ଧରେ ନାର୍କୋଟିକ୍ ଡ୍ରଗ୍ସ ଏବଂ ସାଇକୋଟ୍ରୋପିକ୍ ସବଷ୍ଟେନ୍ସ (ଏନଡିପିଏସ୍) ଆଇନ ଅନୁଯାୟୀ ଅଭିଯୋଗ କରାଯାଇଛି। ତାଙ୍କ ଉପରେ ଏନଡିପିଏସ୍ ଆକ୍ଟ ଅନୁସାରେ କାର୍ୟ୍ୟାନୁଷ୍ଠାନ ନିଆଯିବ । ବର୍ତ୍ତମାନ ଆଇଆଇଟି ବାବାଙ୍କୁ ପୋଲିସ୍ ପଚରାଉଚାର ଜାରି ରଖଛି ।
ପଚରାଉଚରା ସମୟରେ ସେ ନିଜକୁ ଜଣେ ଅଘୋରୀ ବାବା ଭାବରେ ପରିଚୟ ଦେଇଥିଲେ ଏବଂ ତାଙ୍କ ଆଧ୍ୟାତ୍ମିକ ଅଭ୍ୟାସର ଅଂଶ ଭାବରେ ଗଞ୍ଜେଇ ବ୍ୟବହାର କରୁଥିବା ସ୍ୱୀକାର କରିଥିଲେ। ଏହାସହ ଫେବ୍ରୁଆରି ୨୮ ତାରିଖରେ ନୋଏଡାରେ ଏକ ଘରୋଇ ଚ୍ୟାନେଲର ସମ୍ବାଦ ବିତର୍କ କାର୍ୟ୍ୟକ୍ରମରେ ତାଙ୍କୁ ଆକ୍ରମଣ କରାଯାଇଥିବା ନେଇ ସେ ଅଭିଯୋଗ କରିଥିଲେ। ଏହାର କିଛି ଦିନ ପରେ ଏହି ଘଟଣା ଘଟିଛି।
ସେ ଅଭିଯୋଗ କରିଥିଲେ ଯେ କିଛି ଗେରୁଆ ପୋଷାକ ପିନ୍ଧିଥିବା ଲୋକ ସମ୍ବାଦଗୃହକୁ ଆସି ତାଙ୍କ ସହିତ ଦୁର୍ବ୍ୟବହାର କରିଥିଲେ ଏବଂ ତାଙ୍କୁ ବାଡ଼ିରେ ପିଟିଥିଲେ। ‘ଆଇଆଇଟି ବାବା’ ସେକ୍ଟର ୧୨୬ରେ ଥିବା ପୋଲିସ ଆଉଟପୋଷ୍ଟ ବାହାରେ ନ୍ୟାୟ ଦାବି କରି ବସିରହିଥିଲେ। କିନ୍ତୁ ପରେ ପୋଲିସ ତାଙ୍କୁ ବୁଝା ସୁଝା କରିବାରୁ ସେ ଆନ୍ଦୋଳନ ପ୍ରତ୍ୟାହାର କରିଥିଲେ।
ତେବେ ଆଇ ଆଇ ଟି ବାବା ଭାବେ ଜଣାଶୁଣା ଅଭୟ ସିଂହ ମହାକୁମ୍ଭରେ ଦେଖାଯିବା ପରେ ପ୍ରସିଦ୍ଧି ଲାଭ କରିଥିଲେ, ଭାଇରାଲ ହେବା ପରେ ସେ ଏରୋସ୍ପେସ୍ ଇଞ୍ଜିନିୟରିଂ ପଢ଼ିଥିବାର ଦାବି କରିଥିଲେ। ଆଇଆଇଟି ବମ୍ବେର ପୂର୍ବତନ ଛାତ୍ର ଭାବରେ, ସେ ନିଜକୁ “ସତ୍ୟ ସନ୍ଧାନରେ ଆଧ୍ୟାତ୍ମିକ ଯାତ୍ରା” ବୋଲି ବର୍ଣ୍ଣନା କରିଥିଲେ।
