କ୍ଷତିଗ୍ରସ୍ତ ଅଞ୍ଚଳ ବୁଲି ଦେଖିଲେ ରାଜସ୍ବ ମନ୍ତ୍ରୀ

ମୟୁରଭଞ୍ଜରେ ତାଣ୍ଡବ ରଚିଲା କାଳବୈଶାଖୀ । କାହାର ଘର ଭାଙ୍ଗିଛି ଆଉ କାହା ବିଲରେ ଫସଲ ଉଜୁଡ଼ି ଯାଇଛି । ଜିଲ୍ଲାର ବାଙ୍ଗିରିପୋଷି ଓ ବିଶୋଇ ବ୍ଲକର କ୍ଷତିଗ୍ରସ୍ତ ଗାଁ ବୁଲି ଦେଖିଛନ୍ତି ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ । ରାଜସ୍ବ ମନ୍ତ୍ରୀ ସୁରେଶ ପୂଜାରୀ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର, ବାଙ୍ଗିରିପୋଷିର ବିଭିନ୍ନ ପ୍ରଭାବିତ ଅଞ୍ଚଳ ଯାଇ ଲୋକଙ୍କ ସହ ଆଲୋଚନା କରିଛନ୍ତି । କ୍ଷତିଗ୍ରସ୍ତଙ୍କୁ ଭେଟି କ୍ଷତିପୂରଣ ଦେବା ପାଇଁ ପ୍ରତିଶ୍ରୁତି ଦେଇଛନ୍ତି ମନ୍ତ୍ରୀ । ରବିବାର ସକାଳ ୧୦ଟା ବେଳେ ବାଙ୍ଗିରିପୋଷି ମିନି ଷ୍ଟାଡିୟମର ଅସ୍ଥାୟୀ ହେଲିପ୍ୟାଡରେ ଓହ୍ଲାଇ ବ୍ଲକ୍‌ର ବିଭିନ୍ନ ଗାଁ ବୁଲି ଦେଖିଛନ୍ତି । ତିନି ଦିନ ହେଲା ଲଗାତର ବର୍ଷାରେ ଭଙ୍ଗା ଘରେ ପାଣି ପଡୁଥିବାରୁ ରୋଷେଇ ହୋଇନାହିଁ । ଲୋକେ ଭୋକ ଓପାସରେ ରହି ହନ୍ତସନ୍ତ ହେଉଛନ୍ତି ବୋଲି କାନ୍ଦି କାନ୍ଦି ମନ୍ତ୍ରୀଙ୍କୁ ଗୁହାରି ଜଣାଇଛନ୍ତି । ଭାଙ୍ଗି ଯାଇଥିବା ଟାଇଲ ଓ ଆଜବେଷ୍ଟସ ଘରେ ରହୁଥିବା ଲୋକଙ୍କୁ ତୁରନ୍ତ ଘର ଛାତର ବ୍ୟବସ୍ଥା କରିବାକୁ ଗୁହାରି କରିଛନ୍ତି ଲୋକେ । ଅନ୍ୟପଟେ କାଳ ବୈଶାଖୀ ପ୍ରଭାବରେ ପୁରୀ ଜିଲ୍ଲାର ଅସ୍ତରଙ୍ଗ ଏବଂ କାକଟପୁର ଅଞ୍ଚଳର ମୁଗ ଫସଲ ଏବଂ ପରିବା ଫସଲ ବ୍ୟାପକ କ୍ଷତି ହୋଇଛି । ଅଦିନିଆ କାଳ ବୈଶାଖୀ ପ୍ରଭାବରେ ପନିପରିବା ଓ ମୁଗ କିଆରୀରେ ଜମି ରହିଛି ପାଣି । ଲଗାତର ୪ ଘଣ୍ଟା ଧରି ବର୍ଷା, ଚାଷୀଙ୍କ ଅନେକ କ୍ଷତି କରିଛି । ମୁଗ ଫସଲଠୁ ନେଇ ଅମଳ ହେବାକୁ ଥିବା ବିଭିନ୍ନ ପନିପରିବା ଚାଷ ଉଜୁଡି ଯାଇଛି । ହଜାର ହଜାର ଟଙ୍କା ଖର୍ଚ୍ଚ କରି ଫସଲ କରିଥିବା ଚାଷୀ ଏବେ ଧାର କରଜ କିଭଳି ସୁଝିବ ସେ ନେଇ ଚିନ୍ତାରେ ପଡିଛି । ସମସ୍ତ ଅଞ୍ଚଳ ବୁଲି ଦେଖି ସରିବା ପରେ ମନ୍ତ୍ରୀ ମଧ୍ୟ କ୍ଷୟକ୍ଷତିର ପରିମାଣ ଓ ପରିସ୍ଥିତିକୁ ହୃଦୟଙ୍ଗମ କରିଛନ୍ତି । ତୁରନ୍ତ ସମସ୍ତ କ୍ଷତିଗ୍ରସ୍ତ ଘର ମରାମତି ଓ ଆବଶ୍ୟକ ସ୍ଥଳେ ନୂଆ ଘର ଦିଆଯିବ ବୋଲି କହିଲେ ମନ୍ତ୍ରୀ । ଚାଷ ସମ୍ବନ୍ଧୀୟ କ୍ଷୟକ୍ଷତିର ପ୍ରାଥମିକ ଆକଳନ ହୋଇ ସାରିଥିବା ବେଳେ ସମ୍ପୂର୍ଣ୍ଣ ତଥ୍ୟ ରବିବାର ସନ୍ଧ୍ୟା ସୁଦ୍ଧା ସରକାରଙ୍କୁ ଦିଆଯିବ । ଆସନ୍ତା ୨୪ ଘଣ୍ଟା ମଧ୍ୟରେ ସମସ୍ତ କ୍ଷତିଗ୍ରସ୍ତଙ୍କୁ ତାଙ୍କ ଆକାଉଣ୍ଟରେ କ୍ଷତିପୂରଣ ଟଙ୍କା ଦିଆଯିବ ବୋଲି ମନ୍ତ୍ରୀ କହିଛନ୍ତି ।