ଏସ୍ଏସ୍ ରାଜମୌଲିଙ୍କ ପ୍ରଡକ୍ସନ୍ ହାଉସ୍ର ଆଗାମୀ ଫିଲ୍ମର ସାଉଥ୍ ସୁପରଷ୍ଟାର ମହେଶ ବାବୁଙ୍କ ସହ ବଲିଉଡ୍ ଅଭିନେତ୍ରୀ ପ୍ରିୟଙ୍କା ଚୋପ୍ରା ମୁଖ୍ୟ ଭୂମିକାରେ ନଜର ଆସିବେ । ଖବର ଅନୁସାରେ, କୋରାପୁଟର ଦେଓମାଳି ଏବଂ ଅନ୍ୟ ସ୍ଥାନରେ ଫିଲ୍ମର ସୁଟିଂ ହେବ । କୋରାପୁଟର ସୌନ୍ଦର୍ୟ୍ୟ, ପାଣିପାଗ ଏବଂ ଆକୃଷ୍ଟ କରୁଥିବା ବିଭିନ୍ନ ସ୍ଥାନରେ ଫିଲ୍ମର ସୁଟିଂ ହେବା ନେଇ ଏସ୍ଏସ୍ ରାଜମୌଲିଙ୍କ ପ୍ରଡକ୍ସନ୍ ହାଉସ୍ର ପ୍ରଡକ୍ସନ ମ୍ୟାନେଜର ନାଗା ପ୍ରଣୀତ ସୂଚନା ଦେଇଛନ୍ତି । ଜିଲ୍ଲାରେ ଥିବା ଜଳପ୍ରପାତ ସାଙ୍ଗକୁ ଶୀତୁଆ ସକାଳରେ ସୁଟିଂ ହେବ ଫିଲ୍ମ । ଏଥିପାଇଁ ଏସ୍ଏସ୍ ରାଜମୌଲିଙ୍କ ପ୍ରଡକ୍ସନ୍ ହାଉସ୍ ଜିଲ୍ଲା ପ୍ରଶାସନ ଠାରୁ ଅନୁମତି ନେଇଛି । ମାର୍ଚ୍ଚ ୧ରୁ ୨୯ ତାରିଖ ପାଇଁ ସଂସ୍ଥା ନେଇଛି ଫିଲ୍ମ ସୁଟିଂ ଲାଗି ଅନୁମତି ।
ଫିଲ୍ମର ସୁଟିଂ ପୂର୍ବରୁ ଗତବର୍ଷ ଡିସେମ୍ବର ମାସରେ ରାଜମୌଲି କୋରାପୁଟର ସେମିଳିଗୁଡ଼ା ପରିଦର୍ଶନ କରିଥିଲେ । ଏହା ପୂର୍ବରୁ କୋରାପୁଟରେ ଏକାଧିକ ଓଡ଼ିଆ ଚଳଚ୍ଚିତ୍ର ସୁଟିଂ ହୋଇଥିବା ବେଳେ ଏବେ ସାଉଥ୍ ଓ ବଲିଉଡ୍ ସିନେ ନିର୍ମାତାଙ୍କ ଧ୍ୟାନ ଆକର୍ଷଣ କରିଛି ଘାଟିର ପ୍ରାକୃତିକ ସୌନ୍ଦର୍ୟ୍ୟ ସାଙ୍ଗକୁ ମନୋରମ ପାହାଡ଼ ଓ ଘଞ୍ଚ ଜଙ୍ଗଲ । ନିକଟରେ କୋରାପୁଟର ବିଭିନ୍ନ ସ୍ଥାନରେ ପୁଷ୍ପା-୨ର ମଧ୍ୟ ସୁଟିଂ ହୋଇଥିଲା ।
