କୋଭିଡ ସ୍ଥିତିର ସମୀକ୍ଷା ପାଇଁ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଚାଲିଛି କ୍ୟାବିନେଟ ବୈଠକ, ହୋଇପାରେ ଗୁରୁତ୍ୱପୂର୍ଣ୍ଣ ନିଷ୍ପତି

ଭୁବନେଶ୍ୱର : ଦେଶର COVID-19 ସ୍ଥିତିର ସମୀକ୍ଷା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ମନ୍ତ୍ରୀ ପରିଷଦର ବୈଠକ ଆରମ୍ଭ ହୋଇଛି । ପୂର୍ବ ନିର୍ଦ୍ଧାରିତ ସମୟ ଅନୁସାରେ ଏହି ବୈଠକ ସକାଳ 11 ଟାରେ ଆରମ୍ଭ ହୋଇଛି ।  ମହାମାରୀର ଦ୍ୱିତୀୟ ଲହରରେ ମନ୍ତ୍ରୀ ପରିଷଦର ଏହା ପ୍ରଥମ ବୈଠକ।   ଏହି ବୈଠକରେ ଦେଶରେ  ଚାଲିଥିବା ଟୀକାକରଣ ସ୍ଥିତି, ମେଡ଼ିସିନ, ଅକ୍ସିଜେନ, ରାଜ୍ୟମାନଙ୍କର ସ୍ଥିତି ଏବଂ ରାଜ୍ୟ ମାନଙ୍କର ଦାବି ଉପରେ ଆଲୋଚନା ହୋଇପାରେ। ଅନେକ ଜାଗାରେ ବିଭିନ୍ନ ମେଡ଼ିସିନର ବ୍ଲାକ ମାର୍କେଟିଂ ହେଉଥିବା ନଜରକୁ ଆସୁଛି। ଏହାକୁ ନେଇ ମଧ୍ୟ ଆଲୋଚନା ହୋଇପାରେ। ଗତକାଲି କେନ୍ଦ୍ର ସ୍ୱାସ୍ଥ୍ୟ ସଚିବ ଗୃହ ସଚିବଙ୍କ ନିକଟରେ ସବୁଠାରୁ ଅଧିକ ପ୍ରଭାବିତ ନଅ ରାଜ୍ୟରେ କରୋନା ପରିସ୍ଥିତି ସମ୍ପର୍କରେ ଏକ ରିପୋର୍ଟ ଦାଖଲ କରିଥିଲେ। ଯେଉଁଥିରେ  ମହାରାଷ୍ଟ୍ର, କେରଳ, କର୍ଣ୍ଣାଟକ, ଉତ୍ତରପ୍ରଦେଶ, ତାମିଲନାଡୁ, ଦିଲ୍ଲୀ, ଆନ୍ଧ୍ରପ୍ରଦେଶ, ପଶ୍ଚିମବଙ୍ଗ ଏବଂ ଛତିଶଗଡ ଦେଶର ସବୁଠାରୁ ଅଧିକ ପ୍ରଭାବିତ ରାଜ୍ୟ ଭାବେ ରିପୋର୍ଟ ଦେଇଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶରେ COVID-19 ସ୍ଥିତିର ନିରନ୍ତର ସମୀକ୍ଷା କରୁଛନ୍ତି। ସେ ଏହାପୂର୍ବରୁ ରାଜ୍ୟର ମୁଖ୍ୟମନ୍ତ୍ରୀ, ଟିକା ଉତ୍ପାଦନକାରୀ, ଫାର୍ମାସ୍ୟୁଟିକାଲ୍ ଶିଳ୍ପର ସର୍ବୋଚ୍ଚ ଅଧିକାରୀ ଙ୍କ ସହ ବୈଠକ କରି COVID-19 କୁ କିପରି ନିୟନ୍ତ୍ରଣକୁ ଆଣିବେ ସେ ସମ୍ବନ୍ଧରେ ଆଲୋଚନା କରିଥିଲେ। ଅମ୍ଳଜାନ ଉତ୍ପାଦନ ବୃଦ୍ଧି ଏବଂ ଏହାର ପରିବହନ କୁ ନେଇ ଉତ୍ପାଦନକାରୀଙ୍କ ସହ ଏକ ବୈଠକ କରିଥିଲେ।