କିଛି ଦିନ ହେଲାଣି ପ୍ରବାଦପୁରୁଷ ବିଜୁ ପଟ୍ଟନାୟକଙ୍କୁ ନେଇ ରାଜ୍ୟରେ ଚାଲିଛି ପାପ ପୁଣ୍ୟର ହିସାବ ନିକାଶ ।କିଏ କରିଛି ପାପ, ବିଜେପି ନା ବିଜେଡି ?ଏହାକୁ ନେଇ ଗାଁଠୁ ସହର ସବୁଠି ଚାଲିଛି ଚର୍ଚ୍ଚା ।ଏଭଳି ଏକ ପରିସ୍ଥିତି ଉପୁଜିଛି ବିଜୁ ବାବୁଙ୍କ ଜନ୍ମଜୟନ୍ତୀ ପାଳନକୁ ନେଇ ।୯୦ଦଶକରୁ ମାର୍ଚ୍ଚ ୫ତାରଖ ବିଜୁ ଜୟନ୍ତୀରେ ପଂଚାୟତରାଜ ଦିବସ ପାଳନ କରାଯାଉଥିଲା ଏବଂ ଏହା ଏକ ସରକାରୀ ଛୁଟି ଦିବସ ମଧ୍ୟ ଥିଲା ।କିନ୍ତୁ ଚଳିତବର୍ଷ ଏଥିରେ ରାଜ୍ୟ ସରକାର ବ୍ୟତିକ୍ରମ ଆଣି ପଂଚାୟତ ରାଜ ଦିବସକୁ ଏପ୍ରିଲ ମାସରେ ପାଳନ କରିବା ପାଇଁ ନିଷ୍ପତି ନେଇଥିଲେ ।ଯାହା ପରଠାରୁ ରାଜ୍ୟରେ ଆରମ୍ଭ ହୋଇଥିଲା ବିଜୁ ଝଡ ।ସରକାରଙ୍କ ଏପରି ନିଷ୍ପତିକୁ ଉଭୟ ବିଜେଡି ଏବଂ କଂଗ୍ରେସ ବିରୋଧ କରିଥିଲେ ।
ଅବଶ୍ୟ ରାଜ୍ୟସରକାର ପ୍ରବାଦପୁରୁଷଙ୍କ ଜନ୍ମଜୟନ୍ତୀକୁ ରାଜ୍ୟସ୍ତରୀୟ ଉତ୍ସବ ଭାବେ ପାଳନ କରିଥିଲେ ଏହି ଉତ୍ସବରେ ଯୋଗ ଦେବା ପାଇଁ ମୁଖ୍ୟମନ୍ତ୍ରୀ ବିରୋଧଦଳ ନେତା ତଥା ବିଜୁ ବାବୁଙ୍କ ସୁପୁତ୍ର ନବୀନ ପଟ୍ଟନାୟକଙ୍କୁ ଆମନ୍ତ୍ରଣ କରିଥିଲେ ମଧ୍ୟ ନବୀନ ସେହି ଉତ୍ସବରେ ଯୋଗ ଦେଇ ନଥିଲେ ।ଏହି ରାଜ୍ୟସ୍ତରୀୟ ବିଜୁ ଜୟନ୍ତୀ ଉତ୍ସବରେ ନବୀନ ଯୋଗ ନେଦେବାକୁ ସହଜରେ ଗ୍ରହଣ କରି ପାରିନଥିଲେ ରାଜ୍ୟ ସରକାର ।ଏହାକୁ ନେଇ ମୁଖ୍ୟମନ୍ତ୍ରୀ ମୋହନ ମାଝୀ ନିଜ ପ୍ରତିକ୍ରିୟାରେ କହିଥିଲେ ଯେଉଁ ମାନେ ଏହି ଉତ୍ସବରେ ଯୋଗ ଦେଇ ନାହାଁନ୍ତି ସେମାନେ ପାପ କରିଛନ୍ତି ।ହେଲେ କଥା ସେତିକିରେ ସରିନଥିଲା ଏହା ଭିତରେ ବିଧାନସଭା ବଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟ ଆରମ୍ଭ ହୋଇଛି ଆଉ ଏହି ପର୍ଯ୍ୟାୟର ପ୍ରଥମ ଦିନହିଁ ଦେଖିବାକୁ ମିଳିଥିଲା ବିଜୁ ଝଡ ।ବିରୋଧୀ ବିଜେଡି ସଦସ୍ୟଙ୍କ ନାରା ବାଜିରେ ପ୍ରକମ୍ପିତ ହୋଇଥିଲା ଗୃହ ।ବାଚସ୍ପତିଙ୍କ ପୋଡିୟମ ନିକଟରେ ପ୍ରବଳ ହଟ୍ଟଗୋଳ କରିଥିଲେ ବିଜେଡି ସଦସ୍ୟ ମାନେ ବିଜୁ ବାବୁଙ୍କୁ ସରକାର ଅସମ୍ମାନ କରିଥିବା ଅଭିଯୋଗ କରି ବିଜେଡି ସଦସ୍ୟ ମାନେ ନାରାବାଜି କରିଥିଲେ । ଏହା ପରେ ବାଚସ୍ପତି ଗୃହକୁ ମୁଲତବୀ ଘୋଷଣା କରିବା ପରେ ବିଜେଡି ସଦସ୍ୟ ମାନେ ବିଧାନସଭା ପରିସରରେ ଥିବା ବିଜୁବାବୁଙ୍କ ମୂର୍ତୀ ତଳେ ଧାରଣାରେ ବସିଥିଲେ ।
ବିଜେଡି ସଦସ୍ୟଙ୍କ ଏପରି ଆଭିମୁଖ୍ୟକୁ ତୀବ୍ରନିନ୍ଦା କରିଛି ବିଜେପି । ପଂଚାୟତି ରାଜ ମନ୍ତ୍ରୀ ରବି ନାୟକ ପାଲଟା ଅଭିଯୋଗ କରି କହିଛନ୍ତି ବିଜୁ ବାବୁ ହେଉଛନ୍ତି ଦେଶର ବରପୁତ୍ର ତାଙ୍କୁ ବିଜେପି କେବେ ଅସମ୍ମାନ କରିନାହିଁ ବରଂ ବିଜେଡି ଗତ ନିର୍ବାଚନ ସମୟରେ ତାଙ୍କୁ ଅସମ୍ମାନ କରିଛି ।ତେବେ ଅଭିଯୋଗ ଓ ପାଲଟା ଅଭିଯୋଗ ଭିତରେ ବିଧାନସଭା ବଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟ କେତେ ଦିନ ଚାଲି ପାରିବ ତାହା ଆଗକୁ ହିଁ ଜଣା ପଡିବ ।
