ଆଜିର ଦିନରେ ଓଡ଼ିଶାରେ ଜନ୍ମ ନେଇଥିଲେ ଏମିତି ଜଣେ ବରପୁତ୍ର ଯିଏ କୋଟି ଓଡିଆଙ୍କ ପାଇଁ ଥିଲେ ମଉଡ ମଣି । ଓଡିଶା ଲୋକଙ୍କର ପ୍ରକୃତ ଜନନେତା । ସେ ତାଙ୍କ କଥାରେ ହିଁ ଇତିହାସ ବଦଳେଇବାକୁ ସାହସ ରଖୁଥିଲେ । ସେ ଯେତିକି ସାହାସୀ ଥିଲେ ସେତିକି ଧୂରନ୍ଧର ବି ଥିଲେ । କିଏ ତାଙ୍କୁ କୁହେ କିଙ୍ଗ୍ ମେକର ତ ଆଉ କିଏ କୁହେ କଳିଙ୍ଗ ବୀର । କିନ୍ତୁ ଆଜି ବି ସେ ଓଡିଆଙ୍କ ପାଇଁ ସେହି ପ୍ରିୟର ବିଜୁ ବାବୁ ।
୧୯୧୬ ମସିହା ମାର୍ଚ୍ଚ ୫ । ବାପା ଲକ୍ଷ୍ମୀନାରାୟଣ ପଟ୍ଟନାୟକ ଆଉ ମାଆ ଆଶାଲତାଙ୍କ ତୃତୀୟ ସନ୍ତାନ ଭାବେ ଜନ୍ମ ନେଇଥିଲେ ବିଜୁ ପଟ୍ଟନାୟକ । ହେଲେ କିଏ ବା ଜାଣିଥିଲା ଏ ପୁଅ ଦିନେ, ରାଜନୀତିର ସବୁ ଅଙ୍କ ଆଉ ଅଳିନ୍ଦ ଭିତରୁ ଉଠି ଜଣେ ଯୁଗପୁରଷ ଭାବେ ପରିଚିତ ହେବ । ପିଲାଟି ଦିନରୁ ତାଙ୍କର ପାଇଲଟ ହେବାର ନିଶା । ଆକାଶରେ ଝଡ଼ର ଇଗଲ ଭଳି ଉଡି ବୁଲିବାର ଇଚ୍ଛା । ଯେଉଁଥିପାଇଁ ସେ କଲେଜ୍ ପାଠପଢା ନସରିବା ପୂର୍ବରୁ ଚାଲିଯାଇଥିଲେ ଏରୋପ୍ଲେନ୍ ଚଲେଇବା ଶିଖିବାକୁ । ବାସ୍…ଏଇଠୁ ଆରମ୍ଭ ହେଇଥିଲା ତାଙ୍କର ଦୁର୍ଦ୍ଦଷ ଯାତ୍ରା ।
ଇଣ୍ଡୋନେସିଆର ମୁକ୍ତି ସଂଗ୍ରାମ ହେଉ, କି ମୁଖ୍ୟମନ୍ତ୍ରୀ ପଦକୁ ବିନା ଭାବିଚିନ୍ତି ଛାଡିବା ହେଉ, ସବୁଥିରେ ଆଗରେ ଥିଲେ ବିଜୁ ବାବୁ । ମାତ୍ର ୪୫ ବର୍ଷରେ ଓଡ଼ିଶାର ମୁଖ୍ୟମନ୍ତ୍ରୀ ପଦ, ଅନେକ ନେତା ଯେତେବେଳେ.. ନେତା ହେବାକୁ ସ୍ୱପ୍ନ ଦେଖନ୍ତି, ସେତେବେଳକୁ ସତ୍ତାର ଶିଖରରେ ପହଞ୍ଚିଥିଲେ ବିଜୁ । ଖାଲି ପହଞ୍ଚିନଥିଲେ ବରଂ ସତ୍ତାଠୁ ସେ ଉପରେ ଥିଲେ ।
୧୯୬୧ରୁ ୧୯୬୩, ୧୯୯୦ରୁ ୧୯୯୫ । ମାତ୍ର ଦୁଇଥର ଓଡ଼ିଶାର ମୁଖ୍ୟମନ୍ତ୍ରୀ ଆସନରେ ବସିଥିବା ବିଜୁ ବାବୁ ଓଡ଼ିଶା ରାଜନୀତିର କିନ୍ତୁ ଛାଇ ଭଳି ଥିଲେ । ପରାଜୟ ନା ତାଙ୍କୁ ରାଜନୀତିରୁ ଦୂରେଇ ପାରିଥିଲା, ନା ସେ ରାଜନୀତିକୁ ଦୂରେଇ ପାରିଥିଲେ । ସବୁବେଳେ, ଓଡ଼ିଶାର ବିକାଶ ହିଁ ଥିଲା ତାଙ୍କର ପ୍ରଥମ ଲକ୍ଷ୍ୟ ।
ଆଜି ହେଉଛି ବିଜୁ ପଟ୍ଟନାୟକଙ୍କର ୧୦୯ ତମ ଜୟନ୍ତୀ । ରାଜ୍ୟସ୍ତରରୁ ଆରମ୍ଭ କରି , ନିର୍ବାଚନ ମଣ୍ଡଳୀ, ପୌରାଞ୍ଚଳ ଏବଂ ପଞ୍ଚାୟତ ସ୍ତରରେ ଆଜି ସବୁଠି ବିଜୁ ଜୟନ୍ତି ପାଳନ ହେଉଛି ।
