ଏଣିକି ବାହାରେ ଆବର୍ଜନା ଢାଳିଲେ କି ଜାଳିଲେ ଦେବାକୁ ପଡ଼ିବ ଜୋରିମାନା

ଭୁବନେଶ୍ବର,(ଏନଏନଏସ ଓଡ଼ିଆ /୧୧.୦୨): ଆଜିକାଲି ରାଜଧାନୀରେ ଆବର୍ଜନା ଯେମିତି ହୁ ହୁ ହୋଇ ବୃଦ୍ଧି ପାଇବାରେ ଲାଗିଛି । ଲୋକମାନେ ଯେଉଁଠାରେ ପାରୁଛନ୍ତି ସେଠାରେ କୁଢ଼ା ଗଦା କରୁଛନ୍ତି ଆଉ ଜାଳୁଛନ୍ତି । ଯାହା ଏବେ ବିଏମସି ପାଇଁ ମୁଣ୍ଡବିନ୍ଧାର କାରଣ ପାଲଟିଛି । କେଉଁ ପରିମାଣର ଆବର୍ଜନା ବାହାରୁଛି ତାହାକୁ ନେଇ ଏବେ ଘରେ ଘରେ ବୁଲି ବିଏମସି ସର୍ବେକ୍ଷଣ ଆରମ୍ଭ କରିଛି । ପ୍ରତ୍ୟେକ ଦିନ କେତେ ପରିମାଣର ଆର୍ବଜନା ବାହାରୁଛି ତାହାକୁ ଓଜନ କରାଯାଉଛି । ତେବେ ବିଏମସି କେବଳ ଆବର୍ଜନା ସର୍ବେକ୍ଷଣ ନୁହେଁ ବରଂ ବାହାରେ ଆବର୍ଜନା ପକାଇବା, ଜାଳିବାକୁ ନେଇ ମଧ୍ୟ ଏସଓପି ଜାରି କରିଛି । ଆଉ ଏହି ଏସଓପି ଯେଉଁମାନେ ପାଳନ କରୁ ନାହାନ୍ତି ତାଙ୍କ ପାଇଁ ମୋଟା ଅଙ୍କର ଜୋରିମାନା ମଧ୍ୟ ରହିଛି । ସରକାରୀ ସୂଚନା ଅନୁସାରେ ପ୍ରତିଦିନ ଜଣେ ବ୍ୟକ୍ତିଙ୍କ ପାଖରୁ ୩୫୦ ଗ୍ରାମ ଆବର୍ଜନା ବାହାରିବା ଆବଶ୍ୟକ ।୨୦୧୧ ଜନ ଗଣନା ଆଉ ସଫେଇ ଟେଣ୍ଡରରେ ମଧ୍ୟ ସମାନ ଅନୁମାନ ଲଗାଯାଇଛି । କିନ୍ତୁ ୨୦୧୪ରେ ସହରର ଜନସଂଖ୍ୟା ହିସାବରେ ଆବର୍ଜନା ଆକଳନ କରାଯାଇଥିଲା ତାହା ଅନୁସାରେ ପ୍ରତ୍ୟେକ ଦିନ ୫ଶହ ଟନ ଆବର୍ଜନା ବାହାରୁଛି । ସେହି ହିସାବରେ ଏମସିସି ପ୍ରସ୍ତୁତ କରାଯାଇଛି । ହକି ସମୟରେ ମଧ୍ୟ ଅଧିକ ଆବର୍ଜନା ବୃଦ୍ଧି ପାଇଛି । ତେଣୁ ଏବେ ପ୍ରତିଦିନ ଆବର୍ଜନା ପରିମାଣ ବଢ଼ିବାରେ ଲାଗିଛି । ଯାହାର ଆକଳନ ପାଇଁ ଏବେ ବିଏମସି ଯୋଜନା କରୁଛି । ଘର ଘର ବୁଲି ଅଳିଆର ପରିମାଣ ଆକଳନ ହେଉଛି। ଅନ୍ୟପଟେ ଅଳିଆକୁ ଖୋଲାରେ ଜାଳିଲେ ୧୦ ହଜାର ରାଶି ଜୋରିମାନା ଧାର୍ୟ୍ୟ କରାଯାଇଛି। ଏହା ସହ ବାହାରରେ ନିର୍ମାଣ ଅଳିଆ ପକାଇଲେ ୧୦ ହଜାର ଆଉ ସବୁଜ ଅଳିଆ ପକାଇଲେ ୫ ହଜାର ରାଶି ଜୋରିମାନା ରଖାଯାଇଛି । ସେହିଭଳି ମେଡିକାଲ ଆବର୍ଜନା ଏଣେ ତେଣେ ପକାଇଲେ ୧ଲକ୍ଷ ଟଙ୍କାର ଜୋରିମାନା ଧାର୍ୟ୍ୟ କରାଯାଇଛି ।