ନୂଆଦିଲ୍ଲୀ: ଆଜି ଘୋଷଣା ହୋଇପାରେ ପିପିଲି ବିଧାନସଭା ଆସନରେ ଉପ- ନିର୍ବାଚନ ନେଇ ତାରିଖ । ପ୍ରଦୀପ ମହାରଥୀଙ୍କ ଦେହାନ୍ତ ପରେ ଏହି ଆସନଟି ଖାଲି ପଡ଼ିଛି । ଶୁକ୍ରବାର ଅପରାହ୍ଣରେ ଭାରତ ନିର୍ବାଚନ ଆୟୋଗ ୫ ରାଜ୍ୟରେ ବିଧାନସଭା ନିର୍ବାଚନ ତାରିଖ ଘୋଷଣା କରିବେ । ତେବେ କମିଶନ ଆସାମ, କେରଳ, ତାମିଲନାଡ଼ୁ, ପଶ୍ଚିମବଙ୍ଗ ଓ ପୁଡୁଚେରୀ ପାଇଁ ନିର୍ବାଚନ ତାରିଖ ଘୋଷଣା କରିବେ । ଏପ୍ରିଲ-ମେ’ ମଧ୍ୟରେ ଏହି ରାଜ୍ୟଗୁଡ଼ିକରେ ନିର୍ବାଚନ ଅନୁଷ୍ଠିତ ହେବା ନେଇ ଆଶା କରାଯାଉଛି । କରୋନା କାଳରେ ବିହାର ପରେ ପ୍ରଥମ ଥର ପାଇଁ ମିଳିତ ଭାବେ ୫ ରାଜ୍ୟରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ତେବେ ସମ୍ପ୍ରତି ଦେଶରେ କରୋନା ସଂକ୍ରମଣ ବଢ଼ୁଥିବା ନଜରକୁ ଆସିଥିବା ବେଳେ ଯେଉଁ ଗାଇଡଲାଇନ୍ ଜାରି କରାଯିବ ତାହାର କଡ଼ାକଡ଼ି ପାଳନ କରାଯିବର ଆବଶ୍ୟକତା ରହିଛି । ଗୋଟିଏ ଦିନରେ ଭୋଟ ଗଣନା ହେବା ସହ ମେ’ ୧ ପୂର୍ବରୁ ବିଧାନସଭା ଗଠନ ପ୍ରକ୍ରିୟା ଶେଷ ହେବ ବୋଲି ବିଶେଷ ସୂତ୍ରରୁ ସୂଚନା ମିଳିଛି ।
